नेपाली कांग्रेसका पूर्वउपसभापति विमलेन्द्र निधिले फागुन २१ गतेको प्रतिनिधि सभा चुनावमा सहभागी भएर पार्टीको १५ औं महाधिवेशन गर्नुपर्ने बताएका छन्।
उनले १५ औं महाधिवेशन वैशाखमा गर्न उपयुक्त हुने पनि बताए। केन्द्रीय समितिमा कात्तिक १८ गते सहमहामन्त्री महेन्द्र यादवले पेस गरेको कार्यतालिका आफूहरूकै सहमतिअनुसार आएको उनको भनाइ छ।
‘अहिले पहिलो, दोस्रो र तेस्रो आवश्यकता के हो भनेर कसैले सोधे- प्रतिनिधि सभा निर्वाचन मात्रै हो,’ नेपाल महिला संघले आज बानेश्वरमा गरेको कार्यक्रममा बोल्दै निधिले भने, ‘हामीले बढी प्राथमिकता आमनिर्वाचनलाई दिनुपर्छ। आमनिर्वाचन राष्ट्रिय एजेन्डा हो। त्यसले सार्वभौम जनताको मतबाट संसद र त्यहाँबाट जननिर्वाचित सरकार गठन गर्छ।’
उनले पार्टीभित्र रूपान्तरण बहस पनि चलिरहेको उल्लेख गर्दै कुन बेला के काम गर्ने थाहा पाउनुपर्नेसमेत बताए। ‘अहिलेसम्म कांग्रेसले निर्वाचनमा भाग लिने निर्णय गरेको छैन, यो हाँस्यास्पद अवस्था हो,’ उनले भने, ‘फागुन २१ मा चुनाव हुन्छ है, हुँदैन कि भन्ने भ्रम नराख्नुस्। अब दुई महिनामा हामी अधिवेशन गर्ने कि निर्वाचन तयारी गर्ने? क्रियाशील सदस्यता टुंगो लगाएर ७ तहको अधिवेशन गरी दुई महिनामा राष्ट्रिय महाधिवेशन गर्न सकिन्छ त? यसबीचमा समानुपातिक सूची बुझाउनुपर्ने, राष्ट्रिय सभा र प्रतिनिधि सभा उम्मेदवार छान्नुपर्नेछ।’
नेता निधिले पार्टीको नेतृत्व स्वभाविक रूपमा परिवर्तन हुने पनि बताए।
‘देउवाले कार्यवाहक सभापति बनाइसक्नुभएको छ। १५ औं महाधिवेशनबाट सभापति हुन्छु भने पनि उहाँ पाउनुहुन्न,’ उनले भने, ‘नेतृत्व परिवर्तन प्रक्रिया जटिल छैन। अहिले नीति परिवर्तन जरूरी छैन। अहिले अरू कुनै नीति छैन- प्रतिनिधि सभा चुनावमार्फत् सरकार गठन गर्नु एक मात्र नीति हो।’
उनले केन्द्रीय समितिबाट कार्यकाल एक वर्ष थप गरेर वैशाखमा नियमित महाधिवेशन गर्नुपर्ने बताए। ‘पहिले आमनिर्वाचन अनि महाधिवेशन गर्ने हो। तर अहिलेसम्म केन्द्रीय समितिबाट निर्णय भएको छैन, आज बैठक थियो, कार्यवाहक सभापतिले म मिलाउँदैछु भनेर बैठक सार्नुभयो,’ उनले भने, ‘सहमहामन्त्रीजीले राखेको प्रस्ताव कृष्णप्रसाद सिटौला, प्रकाशमान सिंह, ज्ञानेन्द्र कार्की, एनपी साउदलगायत हामीहरूको सहमतिमा ल्याएको हो।’
उनले विशेष महाधिवेशनको पनि कुरा आएको भन्दै विशेष महाधिवेशन माग गरेकाहरूको हस्ताक्षर सनाखत गर्न समय लाग्ने भएकोले त्यो अव्याहारिक भएको बताए।
‘५४ प्रतिशत महाधिवेशन प्रतिनिधिको कुरा नसुन्ने भन्ने तर्क पनि आउँछ। ५४ प्रतिशत हो कि होइन। सनाखत गर्नुपर्यो, त्यसका लागि काठमाडौंमा भेला भएर सनाखत गर्नुपर्छ, अव्यावहारिक कुरा,’ उनले भने, ‘सनाखत गर्न धेरै दिन लाग्छ। अब १५ औं महाधिवेशन नै हुँदैछ वैशाखमा।’
विधानको धारा १७ को २ मा केन्द्रीय समिति वा महाधिवेशन प्रतिनिधिले आवश्यक ठानेमा विशेष महाधिवेशन माग गर्न सक्ने व्यवस्था छ। सोही व्यवस्थाअनुुसार असोज २९ गते ५४ प्रतिशत महाधिवेशन प्रतिनिधिहरूले विशेष महाधिवेशन माग गर्दै कार्यवाहक सभापति पूर्णबहादुर खड्कालाई हस्ताक्षर बुझाएका थिए।
उनले आफूहरूको आलोचना भइरहेको उल्लेख गर्दै कतिपयले कालो कांग्रेस भन्ने गरेको बताए। आलोचना गर्नेहरूलाई कुनै बेला आफूहरूले औंलामा समाएर राजनीतिमा ल्याएको दाबी उनको थियो।
-1746009348.jpg)
