जिल्ला प्रशासन कार्यालय बाराका सहायक प्रमुख जिल्ला अधिकारी छविरमण भट्टराईले जेनजी युवा समूह र प्रहरीबीच झडप हुन थालेपछि कर्फ्यु जारी गरेको बताएका छन्।
‘आज त युवा संघ सडकमा छैन, जेनजी युवा समूह र प्रहरीबीच नै झडप भयो, केही राउण्ड अश्रुग्यास प्रहार भएका छन्, विवरण आएको छैन,’ उनले भने, ‘प्रदर्शनका कारण राजमार्ग बन्द छ, खुलाउनुपर्ने हुन्छ, सुरक्षा निकायलाई काम गर्न सहज होस् भनेर कर्फ्यु लगाएका छौं।’
जेनजी युवाहरूले कारबाहीका लागि माग गरेकामध्ये दुई जनालाई पक्राउ गरिसकेको र अन्यको पनि खोजी भइरहेको उनले बताए।
आरोपितहरूलाई कानून बमोजिम अनुसन्धान र कारबाही प्रक्रिया अघि बढ्ने सहायक प्रजिअ भट्टराईले बताए।
जेनजी युवाहरूले प्रहरीलाई दिएको किटानी जाहेरीमा ६ जनाको नाम उल्लेख गरेका थिए।
उनीहरूमध्ये जितपुर सिमरा उपमहानगरपालिका वडा नं. २ का अध्यक्ष धन बहादुर श्रेष्ठ र वडा नं. ६ का वडा अध्यक्ष कैमुद्धिन अन्सारीलाई प्रहरीले पक्राउ गरिसकेको छ।
प्रदर्शनकारीहरूले भने जेनजी युवाहरूमाथि आक्रमण गर्ने सबैलाई पक्राउ गर्नुपर्ने माग राखेर प्रदर्शन गरिरहेका छन्।
बुधबार दिउँसो प्रदर्शनका क्रममा एमालेका कार्यकर्ता र जेनजी युवाबीच झडप भएको थियो। त्यसको विरोधमा उनीहरूले सिमरा विमानस्थल अगाडि प्रदर्शन गरेका थिए। त्यस क्रममा प्रहरीले लाठी चार्ज गरेपछि प्रदर्शनकारी र प्रहरीबीच झडप भएको थियो।
प्रदर्शनकारीले प्रहरीमाथि ढुंगा हान्नुका साथै विमानस्थलको गेटमा तोडफोड गरेका थिए।
स्थिति नियन्त्रणमा लिन प्रहरीले अश्रुग्यास प्रहार गरेको थियो भने जिल्ला प्रशासन कार्यालय बाराले दिउँसो १२ः३० देखि साँझ ८ बजेसम्म कर्फ्यु जारी गरेको थियो।
प्रहरीले भने घटनामा संलग्न दोषीहरूलाई कारबाहीको दायरामा ल्याउने आश्वासन दिएको छ।
-1763621667.jpg)
-1746009348.jpg)
