नेपाली कांग्रेसको विशेष महाधिवेशन मिति र स्थान तोक्न माग भएको छ।
५४ प्रतिशत महाधिवेशन प्रतिनिधिहरूले असोज २९ गते नै विशेष महाधिवेशन माग गर्दै कार्यवाहक सभापति पूर्णबहादुर खड्कालाई हस्ताक्षर बुझाएकोले विधानअनुसार विशेष महाधिवेशन तोक्न माग भएको हो।
हस्ताक्षर अभियानमा सक्रिय गुरूराज घिमिरेसहित नेताहरूले आज काठमाडौंमा पत्रकार सम्मेलन गरेर विशेष महाधिवेशन मिति र स्थान तोक्न माग गरेका हुन्।
‘नेपाली कांग्रेस रूपान्तरणका लागि हामीले खोजेको केबल महाधिवेशनको कार्यतालिका होइन, सुनिश्चित महाधिवेशन हो। यस विषयमा हुने कुनै पनि प्रकारका जालझेलप्रति सचेत रहन हामी सबै साथीहरूमा आग्रह गर्दछौं,’ विशेष महाधिवेशन पक्षधरले भनेका छन्, ‘विशेष महाधिवेशन, महाधिवेशन प्रतिनिधिको विशेष वैधानिक अधिकार हो, यो कुनै पनि दबाब र कसैको प्रभावबाट रोकिँदैन।’
उनीहरूले विधानले तोकेको अवधिभित्रै अर्थात् आजको ५५ दिनभत्रै महाधिवेशनको सुनिश्चित नभएसम्म आफूहरूको माग फिर्ता नहुने पनि बताएका छन्।
‘त्यसैले हामी केन्द्रीय कार्यसमितिलाई विनम्रतापूर्वक आग्रह गर्न चाहान्छौं- अब नअल्मलिनोहोस्, नअल्मलाउनुहोस्।अबिलम्ब विधानको धारा १७ (२) बमोजिम विशेष महाधिवेशनको मिति र स्थान तोक्ने निर्णय गरियोस्,’ उनीहरूले भनेका छन्।
नेपाली कांग्रेस विशेष महाधिवेशन मागकर्ताहरूको प्रेस विज्ञप्ति;
गत भाद्र २३-२४ को जेनजी आन्दोलन पश्चात मुलुकको बदलिएको राजनीतिक परिस्थितिमा नेपाली कांग्रेसलाई युग सापेक्ष र प्रभावकारी बनाउनका लागि वर्तमान परिस्थितिको सघन समीक्षा, नीतिगत पुनरावलोकन, पार्टीको संरचनात्मक परिमार्जनका लागि विधान संशोधन र नेतृत्व परिवर्तनका लागि केन्द्रीय कार्य समितिको निर्वाचन लगायतका विषयमा विशेष निर्णय गर्नु अपरिहार्य भएकोले नेपाली कांग्रेसको विधानको धारा १७ उपधारा (२) बमोजिम विशेष महाधिवेशन आह्वान गर्नका लागि २४८८ महाधिवेशन प्रतिनिधिहरूको हस्ताक्षरसहित हामीले असोज २९ गते पार्टी केन्द्रीय कार्यलयमा निवेदन दर्ता गरेको बिदितै छ।
हामी विशेष महाधिवेशन माग गर्ने करिa ५५ प्रतिशत हस्ताक्षरकर्ताको प्राथमिकता निर्वाचन अगाडि पार्टीको महाधिवेशन हुनुपर्छ भन्ने नै थियो। हामीले स्पष्ट भनेका थियौं- “नेपाली कांग्रेसको केन्द्रीय कार्यसमितिको यही बैठकबाट विधानको धारा १७(१) बमोजिम २०८२ मंसिर मसान्तभित्र नै १५औं महाधिवेशन सुनिश्चित होस्। यदि १५औं महाधिवेशन समयमा नै गर्न नसक्ने हो भने सोही समयभित्र विशेष महाधिवेशन सम्पन्न गरिने निर्णय गरियोस्।”
विशेष महाधिवेशनका लागि हस्ताक्षर नगर्नु भएका अधिकांश साथीहरू र आम कांग्रेसजनको पनि साझा धारणा यही थियो। यसका लागि पार्टी केन्द्रीय कार्यसमतिलाई हामीले निरन्तर विभिन्न कार्यक्रममार्फत दबाब दिइराख्यौं। तर पार्टीको विधान बमोजिमको हाम्रो मागलाई प्रारम्भदेखि नै स्वीकार गर्न नचाहने, उपेक्षा गर्ने र यति लामो समयसम्म चलेको बैठकमा पनि विशेष महाधिवेशनको विषयलाई औपचारिक एजेन्डा नबनाइएको प्रति हाम्रो गम्भीर आपत्ति छ।
पार्टी बैठकको प्रारम्भमा नै महाधिवेशनको कार्यतालिका बारेमा छलफल गरी समयमा नै निर्णय गरेको भए मंसिरभित्र १५ औं महाधिवेशन संभव हुन्थ्योतर विडम्बना, त्यो सम्भावना टार्नका लागि अनावश्यक रूपमा बैठक लम्ब्याइयो। सुरूमा कार्यतालिकालाई बैठकमा प्रवेश नै गर्न दिइएन, पछि पार्टी विधानको व्यवस्था, प्रचलन,अ धिकार र मर्म अनुरुप कार्यतालिका ल्याउन दिइएन।
कहिले सानेपा, कहिले धोविघाट, कहिले पदाधिकारी बैठक, कहिले पूर्वपदाधिकारी बैठक, कहिले कार्यसम्पादन, कहिले कार्यसमिति बैठक भनेर सम्भव हुन सक्ने महाधिवेशनलाई समेत असम्भव र अनिश्चित बनाइयो। जब महाधिवेशन प्रक्रियागत रुपमा नै असंभव हुने अवस्था भयो, तब अहिले आएर १५ औं महाधिवेशनको कार्यतालिका ल्याउने भन्ने सुन्नमा आएको छ। अब असम्भव छ, यो फगत कार्यतालिका मात्र हो, महाधिवेशन गराउने प्रतिबद्धता होइन, केवल बिशेष महाधिवेशन निस्तेज पार्ने जालझेल मात्र हो भन्ने हाम्रो ठम्याइँ छ।
हामी स्पष्ट छौं- हाम्रो माग फागुन २१ का लागि घोषित निर्वाचन अगाडि नैं नयाँ नेतृत्वका लागि महाधिवेशन हो। महाधिवेशनबाट सघन आत्मसमीक्षा र दृढ संकल्प गर्दै नयाँ नीति र नेतृत्वसहित थप ऊर्जा लिएर निर्वाचनमा होमिने हाम्रो तयारी हुनुपर्छ।अत: हामी पुन: प्रष्ट गर्न चाहान्छौं- विधानको धारा १७(२) मा भएको “केन्द्रीय कार्यसमितिले आवश्यक ठानेमा वा केन्द्रीय महाधिवेशनका ४० प्रतिशत सदस्यहरूले केन्द्रीय महाधिवेशनको बैठक बोलाउन विशेष कारण खुलाई केन्द्र समक्ष लिखित अनुरोध गरेमा निवेदन परेको तीन महिनाभित्रमा विशेष केन्द्रीय महाधिवेशन बोलाउनुपर्नेछ” भन्ने ब्यबस्था बमोजिम पौष २८ भित्र विशेष महाधिवेशन आह्वान गर्नैपर्छ।
विधानको यो व्यवस्था केन्द्रीय कार्यसमितिका लागि रुची वा छनोट, बहुमत वा अल्पमतको विषय होइन, बाध्यकारी हो। अत: यस बाहेक अब अन्य कुनै पनि विकल्प छैन, रहेन। केन्द्रीय कार्यसमिति बैठकको अनिर्णय र अनिश्चिततासँगै अब ती सवै संभावनाका ढोकाहरू बन्द भैसके भन्ने हाम्रो ठहर हो।
विशेष महाधिवेशन माग गरि पार्टीको केन्द्रीय कार्यलयमा दर्ता भएको हस्ताक्षरको सूचीमा विविध कारणले छुट्नुभएका तर नेपाली कांग्रेसको महाधिवेशन समयमै होस् भन्ने भावना भएका सम्पूर्ण महाधिवेशन प्रतिनिधि साथीहरूलाई हस्ताक्षर गरी यस अभियानमा ऐक्यबद्धता जनाउन समेत सविनय अनुरोध गर्दछौं, साथै यस अभियानमा प्रत्यक्ष परोक्ष सहयोग पुर्याउनुहुने पार्टीका केन्द्रीय समितिका साथीहरूलाई विशेष धन्यवादका साथ केन्द्रीय समितिमा रहनुभएका बाँकी साथीहरूलाई पनि विषय र परिस्थितिको गम्भीरता बुझी आम महाधिवेशन प्रतिनिधिहरूको माग बमोजिम विशेष महाधिवेशनका पक्षमा निर्णायक पहलकदमी गर्नुहुन सादर अनुरोध गर्दछौं।
अत: नेपाली कांग्रेस रुपान्तरणका लागि हामीले खोजेको केवल महाधिवेशनको कार्यतालिका होइन, सुनिश्चित महाधिवेशन हो। यस विषयमा हुने कुनै पनि प्रकारका जालझेलप्रति सचेत रहन हामी सवै साथीहरूमा आग्रह गर्दछौं। विशेष महाधिवेशन, महाधिवेशन प्रतिनिधिको विशेष वैधानिक अधिकार हो, यो कुनै पनि दबाब र कसैको प्रभावबाट रोकिँदैन। विधानले तोकेको अवधिभित्रै अर्थात् आजको ५५ दिनभत्रै महाधिवेशनको सुनिश्चित नभएसम्म हाम्रो माग फिर्ता पनि हुँदैन। त्यसैले हामी केन्द्रीय कार्यसमितिलाई बिनम्रतापूर्वक आग्रह गर्न चाहान्छौं;- अब नअल्मलिनोहोस्, नअल्मलाउनुहोस्।अबिलम्ब विधानको धारा १७(२) बमोजिम विशेष महाधिवेशनको मिति र स्थान तोक्ने निर्णय गरियोस्।
-1746009348.jpg)
