अमेरिकी राष्ट्रपति डोनाल्ड ट्रम्पसँग सम्बन्ध सुध्रिएपछि विश्वका सबैभन्दा धनी व्यक्ति इलन मस्क मंगलबार ह्वाइट हाउस फर्किए।
बजेटको विषयमा तीव्र मतभेद भएपछि उनीहरूको सुमधुर सम्बन्ध टुटेको थियो।
ट्रम्पको कर र खर्च विधेयक जुलाईमा संसदबाट पारित भएपछि टेस्लाका मालिक मस्कले अमेरिका पार्टी नाम गरेको नयाँ दलको घोषणा गरेका थिए। सो दलले २०२६ हुने निर्वाचनमा केही मुख्य प्रतिनिधि सभा र सिनेट सिटहरूमा उम्मेदवारी दिने पनि उनले संकेत गरेका थिए।
तर दुई जनाबीचको सम्बन्ध सुध्रिन थालेकाले ट्रम्पले साउदी अरबका राजकुमार मोहम्मद बिन सलमानको सम्मानमा आयोजित भव्य रात्रिभोजका लागि मस्कलाई आमन्त्रित गरेका थिए। ट्रम्पको निम्तो स्वीकार गर्दै मस्क सो भोजमा सहभागी भएका हुन्।
ट्रम्पलाई राष्ट्रपतीय निर्वाचन जिताउन मस्कले २५ करोड डलरभन्दा धेरै खर्च गरेका थिए।
त्यसैले चुनाव जितेपछि ट्रम्पले मस्कलाई सरकारी सेवा प्रभावकारी बनाउन खोलेको डिपार्टमेन्ट अफ गभर्नमेन्ट इफिसियन्सी (डोज) को प्रमुख बनाएका थिए।
ट्रम्पसँगको निकटताका कारण मस्कलाई धेरै नोक्सानी भएपछि उनले मे महिनामा डोज छोडेका थिए। त्यसपछि उनी ह्वाइट हाउस गएका थिएनन्।
मस्कले ट्रम्पको कर र खर्च विधेयकलाई घृणित र घिनलाग्दो भनेर जुन महिनामा झगडाको सुरूआत गरेका थिए। ट्रम्पले ठूलो र सुन्दर विधेयक (बिग ब्युटिफुल बिल) भन्दै आएको सो विधेयक त्यतिबेला प्रतिनिधि सभाबाट एक भोटले मात्रै पारित भएको थियो।
मस्कले लगत्तै विधेयक कि त ठूलो हुनसक्ने कि त सुन्दर, तर ठूलो र सुन्दर दुवै हुन नसक्ने भनेर संक्षिप्त प्रतिक्रिया दिएका थिए। त्यसपछि सो विधेयकलाई घृणित र घिनलाग्दो भनेका थिए।
मस्क त्यतिमै रोकिएनन्। उनले ट्रम्पबारे व्यक्तिगत आक्षेप पनि लगाएका थिए। शक्तिशाली र धनाढ्यलाई बालिकाहरू वेश्याका रूपमा मिलाउने जेफ्री एपस्टिन बारेको अनुसन्धान फाइल आफू पनि सो काण्डमा मुछिने भएकाले ट्रम्पले सार्वजनिक नगरेको आरोप लगाएका थिए।
जेलमा रहेका एपस्टिनले ट्रम्पको पहिलो कार्यकालमा २०१९ मा जेलभित्रै आत्महत्या गरेका थिए। ट्रम्पले मस्कका कम्पनीलाई दिइरहेको अनुदान कटौती गर्ने भनेपछि मस्कले ट्रम्पलाई महाभियोग लगाउनुपर्ने समेत बताएका थिए।
उनले ट्रम्पलाई आफैले राष्ट्रपति बनाएकोसमेत दाबी गरेका थिए।
राष्ट्रपतिसँगको झगडाले आफ्नो व्यवसायमा नोक्सानी हुने भएपछि मस्कले ती पोस्टहरूबारे पछुतो भएको भनेर घुमाउरो पाराले माफी मागेका थिए।
तर करिब चार साताअघिको सुलह जुनको अन्त्यतिर भंग भयो। सोही खर्च विधेयक सिनेटबाट पारित गर्ने बेलामा मस्कले फेरि सो झगडा ब्युँताएका थिए। सो विधेयक पारित भए नयाँ पार्टी खोल्ने मस्कले धम्की दिएका थिए।
मस्कले सो विधेयकको विरोध गरेपछि ट्रम्पले पनि उनका कम्पनीहरूलाई दिएको सरकारी अनुदान कटौती गर्ने धम्की दिएका थिए।
‘इलनले इतिहासमा कुनै पनि मानिसभन्दा धेरै अनुदान पाइरहेका हुन सक्छन्। र अनुदान बिना इलनले सायद दोकान बन्द गरेर दक्षिण अफ्रिका फर्कनुपर्नेछ। अब कुनै रकेट प्रक्षेपण, उपग्रह, वा विद्दुतीय कार उत्पादन हुने छैन। र हाम्रो देशले ठूलो रकम बचत गर्नेछ,’ ट्रम्पले सामाजिक सञ्जालमा लेखेका थिए।
सो विधेयक सिनेटबाट अनि फेरि प्रतिनिधि सभाबाट पारित भएपछि मस्कले धम्की अनुसार नयाँ पार्टीको घोषणा गरेका थिए।
अहिले भने मस्क र ट्रम्पको सम्बन्ध सुध्रिएको छ। त्यसैले ट्रम्पको निमन्त्रणामा उनी रात्रिभोजमा सहभागी हुन ह्वाइट हाउस पुगेका थिए।
(विभिन्न अन्तर्राष्ट्रिय सञ्चार माध्यमहरूको सहयोगमा)
-1746009348.jpg)
