बाराको परवानीपुरमा गर्दै थियो युवा संघले जागरण सभा, विमानस्थलमै भयो झडप (तस्बिरहरू)

सेतोपाटी संवाददाता

काठमाडौं, मंसिर ३

नेकपा एमालेको भ्रातृ संगठन युवा संघ नेपालले आज बाराको परवानीपुरमा जागरण सभा आयोजना गरेको छ।

तर उक्त जागरण सभाका लागि जाँदै गरेका नेताहरू त्रिभुवन अन्तर्राष्ट्रिय विमानस्थलमै रोकिएका छन्।

सिमरा विमानस्थल क्षेत्रमा जेनजी युवा र एमाले समर्थित युवाबीच झडप भएको छ। त्यसैले महासचिव शंकर पोखरेलगायत नेताहरू सिमरा उड्न पाएका छैनन्।

युवा संघको कार्यक्रममा सहभागी हुन महासचिव पोखरेल, जनसंगठन संयन्त्र प्रमुख भानुभक्त ढकाल र पोलिटब्युरो सदस्य महेश बस्नेत सिमरा जान लागेका हुन्।

‘हामी अहिले काठमाडौं विमानस्थलमै छौं, सिमरामा हाम्रा साथीहरू र जेनजीबीच झडप भएको छ भन्ने खबर आयो, त्यही कारण सिमरा जाने जहाज पनि उडेको छैन,’ नेता महेश बस्नेतले सेतोपाटीसँग भने, ‘अहिले प्रशासनले कर्फ्यू पनि लगाएको छ। लोकतन्त्रमा शान्तिपूर्ण कार्यक्रम गर्न पाइन्छ तर त्यहाँ जेनजीका नाममा माओवादी, सरकार, मधेसवादी दलहरू सबै मिलेर एमालेलाई निषेध गर्न लागे।’

उनका अनुसार परवानीपुरमा युवा संघका ईन्चार्ज राजीव पहारी, अध्यक्ष क्षितिज थेबे, उपाध्यक्ष महाराज गुरूङलगायत नेताहरू छन्। उनीहरूले कार्यक्रम गर्ने प्रयास गरेका छन्। यदि कार्यक्रम गर्न नपाए पत्रकार सम्मेलन गरेर धारणा सार्वजनिक गरिने पनि उनले बताए।

आक्रोशित युवाहरूले सिमरा विमानस्थलको गेट तोडफोड गरेका थिए।