बाराको सिमरा विमानस्थल क्षेत्रमा जेनजी पुस्ताका युवाहरू र नेकपा एमाले समर्थित युवाहरूबीच झडप भएको छ।
आज एमाले महासचिव शंकर पोखरेललगायत नेताहरू सिमरा विमानस्थल हुँदै बाराको परवानीपुरमा हुने कार्यक्रममा जाँदै थिए।
एमालेनिकट युवा संघको जागरण सभालाई लिएर सिमरा विमानस्थलमा तनाब सिर्जना भएको हो।
युवा संघको कार्यक्रममा सहभागी हुन एमाले महासचिव पोखरेल, जनसंगठन संयन्त्र प्रमुख भानुभक्त ढकाल र पोलिटब्युरो सदस्य महेश बस्नेत सिमरा जाँदै थिए। त्यहाँ आज एमालेको युवा संघले जागरण सभा राखेको बस्नेतले बताए।
उनका अनुसार एमाले नेताहरू आउने थाहा पाएपछि जेनजीको एउटा समूहले विमानस्थल घेरा गरेको थियो।
प्रदर्शनका कारण एमाले नेताहरू अच्युत मैनाली, किसान श्रेष्ठ लगायत नेताहरू विमानस्थलभित्रै रोकिएका थिए।
‘हामी आउन लागेको थाहा पाएपछि जेनजीको एउटा समूह प्रदर्शनमा उत्रिएको रहेछ। को जेनजी हुन्? तत्कालीन माओवादी केन्द्रले जितपुर सिमरा उपमहानगर जितेको हो, उनीहरू पनि मिसिए होलान्, सरोज यादव मुख्यमन्त्री भएपछि मधेसवादी दल विरोधमै छन्, सबै मिलेका होलान्, हामीले यहाँ जाने कोसिसमै छौं। विमानचाहिँ उडेको छैन,’ उनले भने।
एमाले नेताहरूका अनुसार सिमरा विमानस्थल वरपर तनावको वातावरण छ। ढुंगामुढासमेत भएको थियो।
वातावरण अशान्त बनेपछि जिल्ला प्रशासन कार्यालय बाराले बेलुका ८ बजेसम्मका लागि कर्फ्यु आदेश जारी गरेको छ।
-1746009348.jpg)
