अमेरिकी राष्ट्रपति डोनाल्ड ट्रम्पले बालिकाहरूलाई वेश्यावृत्तिमा लगाएको भन्दै जेल सजाय भोगेका जेफ्री एपस्टिनबारे दस्तावेज सार्वजनिक गर्न आफ्नो रिपब्लिकन दलका सांसदलाई निर्देशन दिएका छन्।
केही रिपब्लिकन सांसदको सहयोगमा विपक्षी डेमोक्र्याटिक दलका सांसदले न्याय मन्त्रालयलाई एपस्टिन मुद्दाका दस्तावेज जारी गर्न बाध्य पार्ने विधेयक प्रतिनिधि सभामा दर्ता गरेका छन्। तर रिपब्लिकन दलबाट निर्वाचित सभामुख माइक जोन्सनले ट्रम्पको निर्देशनमा सो विधेयकलाई रोकेका छन्।
एपस्टिनसँग ट्रम्पको सम्बन्धबारे लगातार नयाँ खुलासा भएपछि दबाबमा आएका ट्रम्पले आइतबार सो विधेयक पास गर्न निर्देशन दिएका हुन्।
आफूसँग लुकाउनु पर्ने केही नभएको भन्दै ट्रम्पले आफ्नो सामाजिक सञ्जाल ट्रुथ सोसलमा रिपब्लिकन सांसदलाई एपस्टिनबारे दस्तावेज सार्वजनिक गर्ने विधेयकमा भोट हाल्न निर्देशन दिएका हुन्।
'डेमोक्र्याटिक दलले गरेको सटडाउनमा हाम्रो हालैको जित लगायत रिपब्लिकन पार्टीका ठूलो सफलताबाट ध्यान मोड्न कट्टर वामपन्थी पागलहरूले चलाएको डेमोक्र्याटिक दलको यो छलबाट अगाडि बढ्ने समय हो,' उनले लेखेका छन्।
ती दस्तावेज सार्वजनिक गर्ने माग धेरै रिपब्लिकन नेताले गरेकाले पार्टी नै विभाजित भएका बेला ट्रम्पले कुरा फेरेका हुन्।
बुधबार अमेरिकाको डेमोक्र्याटिक पार्टीका सांसदहरूले एपस्टिनले ट्रम्पको नाम लिएर विभिन्न व्यक्तिहरूलाई गरेको इमेलहरू सार्वजनिक गरेपछि ट्रम्प झन् धेरै दबाबमा परेका थिए।
गत जुलाईमा एपस्टिनलाई उनको ५० औं जन्मदिनमा पत्र लेखेको विषय अमेरिकी पत्रिका द वाल स्ट्रिट जर्नलले सार्वजनिक गरेपछि ट्रम्प लगातार अप्ठ्यारोमा परिरहेका छन्।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
