आफूविरूद्ध मृत्युदण्डको फैसला सुनाइएको विषयमा बंगलादेशकी निर्वासित पूर्व प्रधानमन्त्री शेख हसिनाले प्रतिक्रिया जनाएकी छन्।
हसिनाको मुद्दा मात्रै हेर्न बनाइएको न्यायाधिकरणले उनलाई तीन वटा कसुरमा दोषी ठहर गर्दै मृत्युदण्डको फैसला सुनाएको थियो।
हसिनाले त्यसलाई जालझेलपूर्ण भनेकी छन्। उनले यसलाई राजनीतिक प्रतिशोधपूर्ण फैसला भनेकी छन्।
साथै यो फैसला पूर्वनिर्धारित र नियोजित रहेको पनि उनले बताएको भनेर भारतीय पत्रिका हिन्दुस्तान टाइम्सले जनाएको छ।
हसिना अघिल्लो वर्षदेखि भारतको शरणमा छिन्।
गत वर्ष बंगलादेशमा भएको विद्यार्थीहरूको आन्दोलन हिंसात्मक हुँदा त्यतिबेला प्रधानमन्त्री रहेकी हसिनाले बल प्रयोग गरेकी थिइन्।
त्यसका बाबजुद विद्यार्थीहरुको आन्दोलन सरकारको नियन्त्रणबाहिर पुगेपछि हसिना देश छाडेर भागेकी थिइन्।
त्यतिबेला १४ सय भन्दा बढी प्रदर्शनकारीहरू मारिएका थिए भने २५ हजारभन्दा बढी घाइते भएका थिए।
अभियोजकहरूले हत्या, हत्या प्रयास, उक्साएको, हिंसा नरोकेको लगायतका कसुरमा मुद्दा दर्ता भएको थियो।
ती कसुरमा उनीविरूद्ध यसअघि नै बंगलादेशले पक्राउ पुर्जी जारी गरिसकेको थियो।
अहिले ती मुद्दामा उनलाई दोषी ठहर गर्दै मृत्यु दण्डको सजाय सुनाएको हो।
-1746009348.jpg)
