लुम्बिनी प्रदेशका सभामुख तुलाराम घर्ती मगरले स्वकीय सचिवालय विघटन गरेका छन्।
सभामुखले आइतबार विज्ञप्ति जारी गरी प्रदेश सभाका पदाधिकारी तथा सदस्यको पारिश्रमिक तथा सुविधासम्बन्धी ऐन, २०७५ को दफा ८ को उपदफा १ अनुसार प्रदान हुँदै आएको स्वकीय सचिवालय तथा निजी कर्मचारी सुविधा विशेष परिस्थिति र वर्तमान अवस्थामा आवश्यकतालाई मध्यनजर गर्दै मंसिर १ गतेदेखि लागू हुने गरी विघटन गरिएको जनाएका छन्।
संघीय सरकारले गरेको सांसद, मन्त्रीहरूका सचिवालय घटाउने निर्णयको पत्र प्रदेशलाई पनि पठाएपछि घर्ती मगरले आफ्नो स्वकीय सचिवालय विघटन गरेका हुन्।
संघीय सरकारले जारी गरेको परिपत्रमा सभामुख र उपसभामुखको बारेमा केही उल्लेख गरिएको नभए पनि सभामुख घर्ती मगरले नैतिकताको आधारमा तत्काललाई सचिवालय हटाएको जनाएका छन्।
सभामुख घर्ती मगरले प्रमुख स्वकीय सचिव, प्रेस संयोजक, कम्प्युटर अपरेटर, चालक र एक कार्यालय सहयोगी सचिवालयमा राखेका थिए।
पिएसओ भने नेपाल प्रहरीबाट रहेका छन्।
सभामुख घर्ती मगरले सचिवालय विघटन गरेको पत्र आइतबार नै प्रदेशसभा सचिवालयमा पठाएर दर्ता भइसकेको प्रदेश सभाका सूचना अधिकारी गिरिराज खनालले बताए।
सचिवालय हटाइएपछि सभामुख घर्ती मगरको लागि चालक व्यवस्थापन कसरी गर्ने भन्ने अन्योल रहेको प्रदेश सभा सचिवालयले जनाएको छ।
-1746009348.jpg)
