मधेश प्रदेशको पाँचौ मुख्यमन्त्री सरोजकुमार यादवले पदभार ग्रहण गरेका छन्।
प्रतिकूल परिस्थितिका वावजुद मधेश भवन छिरेर उनले मुख्यमन्त्री तथा मन्त्री परिषदको कार्यालयमा पदभार ग्रहण गरेका हुन्।
उनले मधेश आन्दोलनका सहिदलाई ‘मधेश रत्न’ले सम्मान गर्ने पहिलो निर्णय गरेका छन्।
‘देशमा संघीयता ल्याउनमा मधेशको योगदान छ, संघीयता ल्याउनमा सबैभन्दा अग्रणी भूमिका कसैको छ भने मधेश प्रदेशबासीको हो,’ उनले भने, ‘मधेश आन्दोलनमा सहिद भएकालाई पैसा दिएर मात्रै पुग्दैन, सम्मान भएन, सम्मानित भएनन्। उहाँहरुलाई मधेश रत्न नामक विभूतिबाट सम्मान गर्ने निर्णय गरेको छु।’
त्यसका राशी वा अरू थप विषयवस्तु कार्यविधि बनाएर टुंग्याउने उनको भनाइ छ।
मन्त्री मण्डल कहिले विस्तार हुन्छ भन्ने जिज्ञासामा उनले नयाँ प्रदेश प्रमुख आएपछि मन्त्रीपरिषद थप विस्तार हुने बताए।
‘मन्त्री मण्डल चार सदस्यीय छँदैछ, प्रदेश प्रमुख पदमुक्त भएर नयाँ प्रदेश प्रमुख आउँदै हुनुहुन्छ, उहाँसँग कुराकानी भइसकेको छ, आएपछि फोन गर्छु भन्नुभएको छ,’ उनले भने, ‘ उहाँ आएपछि मन्त्री परिषद विस्तार हुन्छ।’
तत्कालिन प्रदेश प्रमुख सुमित्रा सुवेदी भण्डारीले संविधानको धारा १६८ (३) बमोजिम यादवलाई आइतबार राति मुख्यमन्त्रीमा नियुक्त गरेकी थिइन्।
बिरामी भएकोले उपचारका लागि काठमाडौं जान्छु भनेर निस्किएकी उनले सोमबार बिहान बर्दिबासको एक होटलमा मुख्यमन्त्री र अन्य मन्त्रीहरूलाई सपथ ग्रहण गराएकी थिइन्।
संविधानको धारा १६८ (२) को कोर्ष पूरा नगरी उपधारा ३ बाट अघि बढेको भन्दै उनको चर्को आलोचना भएको थियो। त्यसपछि केन्द्र सरकारले उनलाई पदमुक्त गरी सुरेन्द्र लाभले नयाँ प्रदेश प्रमुख नियुक्त गरेको छ।
प्रदेश प्रमुख भण्डारीले चालेको कदमको मधेश प्रदेश सभामा प्रतिनीधित्व गर्ने ७ दलले विरोध जनाइरहेका छन्।
उनीहरूले सर्वोच्च अदालतमा मुद्दा दायर गर्नुका साथै सडकमा विरोध प्रदर्शन समेत गरिरहेका छन्।
-1746009348.jpg)
