नेकपा (एमाले) का निर्वाचन विभाग प्रमुख नीरज आचार्यले देशको पछिल्लो राजनीतिक परिस्थितिमा आएको अस्थिरता र जनअविश्वासका कारण केही राजनीतिक दलहरू आफ्नो अस्तित्व नै जोगाउन नसकी हराउँदै गएको टिप्पणी गरेका छन्।
मंगलबार जाजरकोटको जुनीचाँदे गाउँपालिका–सानाखोलामा एमालेले आयोजना गरेको जागरण सभामा बोल्दै आचार्यले पछिल्ला केही दिनयता देशमा देखिएको राजनीतिक उथलपुथल र सत्ता स्वार्थका खेलले साना दलहरू टुटफुट र विसर्जनको विन्दुमा पुगेका बताएका छन्।
‘नेकपा (एमाले) भने देशको विकास र जनताको हितमा अडिग भएर अघि बढिरहेको छ,’ एमाले केन्द्रीय सदस्य समेत रहेका उनले भने, ‘परिस्थितिको सामना गर्न नसकी केही दलहरूले पार्टी कार्यालयका सटर बन्द गरे, पार्टीका बोर्ड उल्ट्याए र आफ्नै संगठन छाडेर हिँडे। पार्टी बिगठन गरे। तर एमाले जनताको साथ र राष्ट्रप्रतिको प्रतिबद्धतासहित दृढतापूर्वक अघि बढिरहेको छ।’
संविधान, सार्वभौमसत्ता र राष्ट्रियताको संरक्षण एमालेको पहिलो प्राथमिकता भएको उनले बताए।
‘मुलुकको सार्वभौमसत्ता, राष्ट्रियता र संविधानको रक्षा हाम्रो दायित्व हो। यसको लागि जनताको साथ अपरिहार्य छ, जनताको विश्वासले नै देश बलियो बन्छ,’ उनले भने।
अहिले एमाले देशव्यापी जनजागरण अभियानमार्फत गाउँ–गाउँमा, वडादेखि बस्तीमा पुगेको उनको भनाइ थियो।
‘जहाँ जनताको आवाज सुन्ने र सशक्त बनाउने अभियान चलिरहेको छ। एमालेले जे भन्छ, त्यसलाई काममार्फत प्रमाणित गर्छ,’ उनले भने, ‘तर आज सत्तामा रहेका केही केही जेनजी नामका मन्त्रीहरू बनेका छन्। उनीहरू भाषणमा सीमित छन्। उनीहरूलाई जनताको पीडा होइन, सत्ताको मिठास मात्र चाहिएको छ।’
उनले अगाडि भने, ‘जनताको ढोका ढक्ढक्याउने, गाउँमा पुग्ने, किसान र मजदुरसँग बस्ने सरकार चाहिन्छ। तर अहिले सत्तामा रहेकाहरू सामाजिक सञ्जालका भित्ता नियाल्दै प्रचारबाजी गर्न व्यस्त छन्।’
-1746009348.jpg)
