नेकपा (एकीकृत समाजवादी) का महासचिव घनश्याम भूसालले नयाँ पार्टी गठनका २० आधार प्रस्तुत गरेका छन्।
माओवादी केन्द्रसँगको एकतामा नजाने घोषणा गर्दै वाम पुनःगठनको नयाँ आधार तयार पारिरहेका भूसालले २० विशेषता सहितको नयाँ आन्दोलनको विकास गर्न लागेका हुन्।
उनले अघि सारेको नवीन पार्टीले दलाल पुँजीवादका ठाउँमा राष्ट्रिय पुँजीको विकास गर्दै समाजवादी रुपान्तरणलाई सुनिश्चित गर्ने विशेषता रहने बताएका छन्।
त्यस्तै सबै क्षेत्रमा राष्ट्रिय पुँजीको विकास गरी बेरोजगारी अन्त्य गर्ने योजनालाई नेतृत्व गर्न सक्ने, सामाजिक विभेदलाई उन्मुलन गर्ने अभियानलाई अगुवाई गर्न सक्ने र भ्रष्टाचारलाई अन्त्य गर्दै र सुशासनलाई प्रत्याभूति गर्न सक्ने समाजवादी ध्येयको सङ्गठन हुने उल्लेख गरेका छन्।
आजको युगमा पुँजीवादी साम्राज्यवादी शोषणका विरुद्ध लड्न सक्ने चेतनाको सदस्यहरुको सङ्गठन, मुलुकको सार्वभौमसत्ता, स्वतन्त्रता र स्वाधीनका प्रश्नमा हरेक सदस्य सचेत रहेको सङ्गठन र सबै सदस्यहरुमा क्रान्तिकारी वैचारिक तथा साङ्ठानिक योग्यता सुनिश्चित हुने मापदण्डका आधारमा हरेक कमिटीका पदाधिकारीको चयन, निर्वाचनका उम्मेदवारहरुको चयनलगायत अन्य विषयमा माथिल्ला कमिटीको कुनै पनि हस्तक्षेप नहुने व्यवस्था हुने पनि उनले बताएका छन्।
यस्तै पार्टीका सबै सदस्यहरु आफ्नै उत्पादनमा बाँच्छन्भन्ने कुराको प्रत्याभूति, सबै कमिटी निर्वाचित हुने र सबै निर्णय संस्थागत हुने, नीतिगत सबै निर्णयमा कुनै कमिटीका सदस्यले मात्रै होइन, सबै सदस्यले भोट गर्न पाउने(यस्तो प्रत्यक्ष लोकतन्त्रको अभ्यास गर्न आजको प्रविधिले सम्भव बनाएको छ), हरेक कमिटीका उम्मेदवार पदाधिकारीहरुमाथि सार्वजनिक उजुरीको व्यवस्था र पदका कारणले आर्थिक हैसियत नबढ्ने कुराको ग्यारण्टी (अर्थात् कसैले पनि घुस खाँदैनन् भन्ने कुराको प्रत्याभूति) हुने कुरा पनि उल्लेख गरेका छन्।
शिक्षा र स्वास्थ्यमा नीजी लगानी गर्नेहरु निश्चित समयमा पार्टी नेतृत्वमा रहने छैनन् भन्ने प्रत्याभूति, कुनै पनि फौजदारी मुद्दा लागेको व्यक्तिको सदस्यता स्वतः निलम्बन हुने, आदेश र फर्मानमा होइन, सम्बाद र सहकार्यमा आधारित, जनसंगठनका अध्यक्षहरु सम्बन्धित तहको पार्टी कमिटीको सदस्य हुने, इञ्चार्जका नाममा कसैलाई पनि नपठाउने, पार्टीको तर्फबाट गएका सबै जनप्रतिनिधि त्यही स्तरको पार्टी कमिटीको प्रत्यक्ष निर्देशनअन्तरगत रहने व्यवस्था पनि उनले उल्लेख गरेका छन्।
सबै तहका जनप्रतिनिधिको उम्मेदवारको क्रान्तिकारी योग्यताको निर्धारण, हरेक तहका कमिटीका सदस्यको योग्यता निर्धारण गरिने, सदस्यहरुको सदस्यता शुल्क र पारदर्शी सार्वजनिक चन्दामा आधारित आर्थिक व्यवस्थापन, जिम्मेवारी पूरा गर्न नसक्ने कुनै पनि पदाधिकारी वा सदस्यको पद रिक्त हुने, हरेक कमिटीमा चुनिन पाउने अवधिको निर्धारण पनि उनले विशेषताका रूपमा उल्लेख गरेका छन्।
‘यस्ता मापदण्डका आधारमा पार्टीहरूको पुनर्गठन गर्दै त्यसरी पुनर्गठित पार्टीहरुको ध्रुविकरण र एकताका आधारमा हामीले सिङ्गो कम्युनिष्ट आन्दोलनलाई पुनर्गठित र एकीकृत गर्न सक्छौं। त्यस्तो पार्टीले मात्रै मुलुकलाई आजको राजनीतिक गतिरोधबाट मुक्त गर्दै मुलुकको समृद्धि र समाजवादको दिशामा अगाडि बढाउन सक्छ। एकता वा एकीकरणको यो बाटो सुल्टो हुन्छ,’ भूसालले दस्तावेजमा भनेका छन्।
-1762325097.jpg)
-1746009348.jpg)
