उपेन्द्र यादव नेतृत्वको जनता समाजवादी पार्टी नेपालले आफ्नो दलको झण्डामा भएको पाँचकुने तारा अन्य राजनीतिक दललाई चुनाव चिह्नका रूपमा प्रयोग गर्ने अनुमति नदिन निर्वाचन आयोगको ध्यानाकर्षण गराएको छ।
जसपा नेपालका प्रवक्ता मनिषकुमार सुमनले विज्ञप्ति जारी गर्दै पाँचकुने तारालाई अन्य दलले चुनाव चिह्न दाबी गर्न लागेको सम्बन्धी सञ्चार माध्यमहरूमा आएको समाचारप्रति ध्यानाकर्षण भएको जनाएको हो।
नेकपा माओवादी केन्द्र र एकीकृत समाजवादी पार्टी मिलेर बन्ने नयाँ दल नेपाल कम्युनिष्ट पार्टीले पाँचकुने तारालाई चुनाव चिह्न बनाउन लागेको चर्चा भइरहेको छ। सामाजिक सञ्जालमा उक्त पार्टीका कार्यकर्ताहरूले पाँच कुने तारा भएको फोटो र भिडिओहरू सेयर गरिरहेका छन्।
आफ्नो दलको पार्टीको झण्डामा भएको तारालाई अरूले प्रयोग नगरून् भनेर निर्वाचन आयोगलाई समेत ध्यानाकर्षण गराइएको सो पार्टीका नेता प्रकाश अधिकारीले सेतोपाटीलाई बताए।
जसपा नेपालले पछिल्लो समय छाता चुनाव चिह्न प्रयोग गर्ने गरेको छ।
-1746009348.jpg)
