नेकपा (माओवादी केन्द्र) विभिन्न दलहरूसँग एकताको कसरतमा छ।
जेनजी आन्दोलनपछि केन्द्रीय कमिटी भंग गरी मंसीरमा महाधिवेशन गर्ने निर्णय गरेको माओवादी केन्द्रले त्यसअघि पार्टी एकता गर्न विभिन्न दलहरूसँग छलफल गरिरहेको छ।
नेकपा (एकीकृत समाजवादी), महेन्द्र राय यादव नेतृत्वको जनता समाजवादी पार्टी, एमालेबाट विद्रोह गरेका प्रेम बहादुर सिंहको पार्टी, राजु कार्कीको नेकपा समाजवादी, सुवास काफ्लेको जनसमाजवादी पार्टी, विप्लव नेतृत्वको कम्युनिस्ट पार्टी नेपालबाट विद्रोह गरेका चीरन सीको समूहसँग एकता हुने टुंगो लागेको माओवादी केन्द्रका प्रवक्ता अग्नि सापकोटाले जानकारी दिएका छन्।
यी दल र समूहसँग एकताका विषयमा छलफल गर्न शनिबार माओवादीको सचिवालय बैठक बसेको थियो।
बैठकले एकताका लागि ढिला गर्न नहुने निष्कर्ष निकालेको प्रवक्ता सापकोटाले जानकारी दिए।
'एकता ढिलो भए राष्ट्रिय राजनीतिमा पहलकदमी कमजोर हुन्छ। देश झन झन अराजकता र संकटतिर जान सक्छ,' बैठकको निर्णय सुनाउँदै प्रवक्ता सापकोटाले भने।
उनले पार्टी एकताका लागि सैद्धान्तिक र नीतिगत कुराहरू करिब टुंगिएको पनि बताए।
'वैचारिक राजनीतिक सैद्धान्तिक नीतिगत कुराहरू करिब करिब फाइनल भइसकेको छ। प्राविधिक र संगठनात्मक विषयमा सचिवालय बैठकमा छलफल भएको छ,' उनले भने।
एकताका लागि छलफल भइरहेका दलहरूलाई सग्लो रूपमै एकतामा ल्याउन आफूहरूले भरमग्धुर प्रयत्न गरेको पनि उनले बताए।
'सबै पार्टी सिंगै एकतामा ल्याउन हरसम्भव प्रयास गरेका हौं। त्यसका लागि कुनै कसर बाँकी छाडिएको थिएन,' उनले भने। यद्यपि निर्णय गर्ने अधिकार सम्बन्धित दलसँग भएकाले अहिले एकताका लागि तयार रहेका पक्षसँग एकता गरिने उनले बताए।
एकीकृत समाजवादीको केन्द्रीय कमिटीले माओवादी केन्द्रसँग एकता गर्ने निर्णय गरेकोमा सम्मानित नेता झलनाथ खनाल पक्ष एकताको विपक्षमा उभिएको छ।
उनीहरूले शनिबार काठमाडौंमा छुट्टै भेला पनि गरेका थिए।
माओवादी केन्द्र महाधिवेशन आयोजक समिति संयोजक पुष्पकमल दाहालले पनि एकता चाँडै टुंगिने बताएका छन्।
'हप्ता दिन कट्दैन,' एकता कहिलेसम्म टुंगिन्छ भनेर पत्रकारहरूले सोधेको प्रश्नमा दाहालको जबाफ थियो।
-1746009348.jpg)
