नेपाली कांग्रेसको केन्द्रीय कार्यसमिति बैठक आज दिउँसो १ बजेदेखि पुन: सुरू हुँदैछ।
केन्द्रीय समितिमा महाधिवेशनलगायत १० एजेन्डामा छलफल हुनेछ।
केन्द्रीय समिति बैठकअघि कार्यवाहक सभापति पूर्णबहादुर खड्का र महामन्त्री विश्वप्रकाश शर्माबीच छलफल भएको छ। साथै कार्यवाहक सभापति खड्का र महामन्त्रीद्वय गगन थापा र शर्माबीच पनि केन्द्रीय समिति बैठकअघि छलफल हुनेछ।
महामन्त्री शर्माले कार्यवाहक सभापति खड्कालाई ४ वैकल्पिक प्रस्ताव दिएका छन्।
पहिलो विकल्प- कार्यसम्पादन समितिको बैठकमा महामन्त्री गगन थापाद्वारा प्रस्तावित मंसिर २७-२९ मा १५ औं महाधिवेशन गर्ने कार्यतालिका केन्द्रीय समितिमा प्रस्तुत गरेर पारित गरौंl
उनले व्यक्तिगत र समूहगत आग्रहभन्दा माथि उठ्न कार्यवाहक सभापति खड्कालाई आग्रह गरेका छन्।
‘सभापतिज्यूले कुन उचाइमा उठेर हेर्नुभयो, हामीले त्यो पछ्याउँ, व्यक्तिगत या समूहगत आग्रहभन्दा माथि उठेर काम गरौं,’ महामन्त्री शर्माको भनाइ छ।
सभापति देउवा पक्षले मंसिरमा नियमित महाधिवेशन गर्न क्रियाशील सदस्यतालगायत विषयले समय अभाव हुने बताउँदै आएको सन्दर्भमा महामन्त्री शर्माले त्यसका लागि पनि वैकल्पिक प्रस्ताव अघि सारेका छन्।
महामन्त्री शर्माको दोस्रो प्रस्ताव छ- विशेष महाधिवेशन मंसिर मसान्तभित्रै।
पार्टी विधानको धारा १७ (२) बमोजिम `केन्द्रीय समितिले चाहेमा´ भनेर उल्लेखित दफा बमोजिम विशेष महाधिवेशन बोलाउन पनि सकिने शर्माको भनाइ छ। सोही धाराअनुसार ४७४३ महाधिवेशन प्रतिनिधिमध्ये २४८८ जना (५४ प्रतिशत) ले २९ असोजमै कार्यवाहक सभापति खड्कालाई विशेष महाधिवेशन माग गर्दै हस्ताक्षर बुझाइसकेका छन्। हस्ताक्षर बुझेको ३ महिनाभित्र विशेष महाधिवेशन बोलाउनुपर्ने हुन्छ।
साथै महामन्त्री शर्माले तेस्रो विकल्प पनि अघि सारेका छन्।
विधानको १७ (२) बमोजिम नै ४० प्रतिशत बढी महाधिवेशन प्रतिनिधिले गरेको लिखित माग सम्बोधन गर्दै मंसिर मसान्तभित्रै महाधिवेशन गर्नेl यसमा पनि सहमति नजुटे, व्यापक युवा प्रवेशको ढोका खोल्न, विशेष भन्दा नियमित उपयुक्त ठहर गर्दै चौथो विकल्पमा जान सकिने महामन्त्री शर्माले कार्यवाहक सभापति खड्कालाई भनेका छन्।
चौथो विकल्प- थप समय लिएर नियमित महाधिवेशन नै आयोजना गरौं भन्ने छ। त्यसका लागि पुष १६ देखि १९ सम्मको मिति उपयुक्त हुन्छ भन्नेमा शर्मा छन्।
पुष १६ बिपी कोइरालाले राष्ट्रिय एकता तथा मेलमिलापको नीति लिएर स्वदेश फर्किएको समय थियो।
केन्द्रीय समिति बैठकबाट निर्वाचन समिति पुनर्गठन, विधान संशोधन मस्यौदा समिति गठन, महाधिवेशन तयारीसँग सम्बन्धित अन्य उपसमिति गठन गर्न पनि उनले सुझाव दिएका छन्।
साथै प्रतिनिधि सभा विघटन उपर उब्जिएको संवैधानिक प्रश्नको निरुपण सर्वोच्च अदालतले गरेपछि त्यसको ठोस टुंगो लाग्ने भन्दै उनले फागुन २१ को निर्वाचनको तयारीमा पार्टी लाग्ने निर्णय गरिनुपर्ने बताएका छन्।
तर उम्मेदवार चयन गर्दा प्राइमरी इलेक्सनबाट गर्नुपर्ने प्रस्ताव उनको छ।
महाधिवेशन प्रतिनिधि चयनसँगै हरेक निर्वाचन क्षेत्रबाट क्षेत्रीय प्रतिनिधिले न्यूनतम एक महिलासहित ३ जनाको नाम फागुन २१ को उम्मेदवारका रूपमा सर्वसम्मत या निर्वाचनको प्रक्रियाबाट सिफारिस गर्न लगाउने निर्णय केन्द्रीय समितिले लिनुपर्नेमा शर्मा छन्।
साथै राष्ट्रिय राजनीतिलाई 'सही ट्र्याक' मा ल्याउन सबै राजनीतिक दलहरूसँग संवादको आयोजना गर्नुपर्ने शर्माको भनाइ छ।
उनले जेनजी पुस्ताका युवाहरूसँग संवाद गर्न ३ सदस्यीय कार्यदल गर्न गरेर जान पनि कार्यवाहक सभापति खड्काको ध्यानाकर्षण गराएका छन्।
-1746009348.jpg)
