नेपाली कांग्रेसका ६ जना महानगर सभापतिहरूले एक महिनाभित्रै महाधिवेशन गर्न सम्भव रहेको बताएका छन्।
काठमाडौं महानगर सभापति निलकाजी शाक्य, पोखरा महानगर समिति सुरेन्द्रमान विजुक्छे, ललितपुर महानगर सभापति शुभानन धाख्वा, विराटनगर महानगर सभापति दीपक चापागाईं, भरतपुर महानगर सभापति चित्रसेन अधिकारी, वीरगञ्ज महानगर समिति सभापति मनिन्द्र नेपालीले आज अन्तर महानगर कार्यसमिति बैठक गरी उक्त कुरा निष्कर्ष निकालेका हुन्।
बैठकले पार्टीको नियमित महाधिवेशन समयमै सम्पन्न गर्न आग्रह गरेका छन्। पालिकाहरूसँग समन्वय गरी आफूहरूले महाधिवेशनका लागि सहयोग र समन्वय गर्नेसमेत उनीहरूको भनाइ छ।
महाधिवेशनका लागि उनीहरूले कार्यतालिका पनि प्रस्ताव गरेका छन्। दुई साताभित्र क्रियाशील सदस्यता टुंगो लगाएर एक महिनाभित्रै महाधिवेशन गर्न सकिने उनीहरूको प्रस्तावित कार्यतालिकामा उल्लेख छ। यो कार्यतालिकासहित अन्तर महानगर कार्यसमिति बैठकका निर्णय महानगर सभापतिहरूले केन्द्रीय कार्यालयलाई बुझाएका छन्।
-1746009348.jpg)
