कर्णाली प्रदेशका मुख्यमन्त्री यामलाल कँडेलले आगजनी, लुटपाट र चोरीका घटनालाई राजनीतिक दृष्टिले नहेर्न आग्रह गरेका छन्।
बुधबार सुर्खेत आइपुगेका जाँचबुझ आयोगका सदस्य विश्वेश्वरप्रसाद भण्डारी लगायतसँग भेटका क्रममा मुख्यमन्त्री कँडेलले भदौ २४ गते दिउँसो १ बजेपछि सार्वजनिक तथा व्यक्तिगत सम्पत्तिमा भएको लुटपाट, चोरी र आगजनीको घटनाको राजनीतिक नभई उपद्रो भएको बताएका हुन्।
नेकपा एमालेका नेता समेत रहेका कँडेलले आन्दोलनको नाममा सार्वजनिक र व्यक्तिगत सम्पत्तिमा गरिएको क्षतिको निष्पक्ष अध्ययन गरी सत्यतथ्य सार्वजनिक गर्न नसक्ने हो भने आयोगको औचित्य नरहने बताएका हुन्।
मुख्यमन्त्री कँडेलले विगतमा राजनीतिक आन्दोलनका जनआन्दोलन भए पनि ती कहिल्यै नागरिकको निजी सम्पत्तिमा आगजनी वा लुटपाट जस्ता घटना नभएको स्मरण हुँदा अहिलेको जेनजीको नाममा भएको आन्दोलन नभई उपद्रो भएको बताएका हुन्।
‘त्यस्तो अपराधलाई राजनीति भनेर ढाकछोप गरियो भने कानूनको शासन कमजोर हुन्छ र अराजकता बढ्ने खतरा रहन्छ,’ मुख्यमन्त्री कँडेलले भने, ‘त्यसले भविश्यमा जो कोही आम नागरिक पनि असुरक्षित रहुने अवस्था आउन सक्छ।’
अपराधजन्य कार्यमा संलग्न जो कोही भए पनि कानून अनुसार कारबाही हुनुपर्ने माग पटक/पटक दोहोर्याएका मुख्यमन्त्रीले जाँचबुझ आयोग र प्रहरी प्रशासनले सत्यतथ्य र निष्पक्ष अनुसन्धान गरी दोषीलाई उम्कन दिन नहुने जोड दिए।
उदण्डहरूलाई कारबाहीमा ल्याएमा मात्रै भविष्यमा यस्ता घटनाको पुनरावृत्ति रोक्न सकिने मुख्यमन्त्री कँडेलको जोड थियो।
मुख्यमन्त्रीको राय सुनेपछि जाँचबुझ आयोगका सदस्य विश्वेश्वरप्रसाद भण्डारीले निजी घर जलाउने कार्यलाई स्पष्ट रूपमा आपराधिक गतिविधिको रूपमा आयोगले अध्ययन गर्ने र सोही अनुरूप कारबाही हुने विश्वास दिलाएका थिए।
व्यक्तिका घरमा आगजनी, लुटपाट र चोरी गर्ने कुरा राजनीतिक मान्न नसकिने उनले पनि स्वीकार गरेका थिए।
सो अवसरमा सुर्खेतका प्रहरी प्रमुख एसपी सुधिरराज शाहीले हालसम्म जेनजी आन्दोलनका नाममा जिल्लाका भएका आगजनी, लुटपाट र चोरी सम्बन्धी फोटो तथा भिडिओ प्रमाणहरू संकलन गरिएको बताएका थिए।
त्यस्ता घटनामा संलग्न व्यक्ति पहिचानको अन्तिम चरणमा पुगेको र केही दिनभित्रै कानुनी कारबाहीको प्रक्रिया अगाडि बढाइने एसपी शाहीले बताएका थिए।
-1746009348.jpg)
