नेकपा (माओवादी केन्द्र) का संयोजक पुष्पकमल दाहाल ‘प्रचण्ड’ ले देश सम्हाल्ने र भ्रष्टाचार अन्त्य गर्ने पार्टी माओवादी नै भएको बताएका छन्।
गोरखामा आइतबार जिल्ला स्तरीय कार्यकर्ता भेटघाट तथा प्रशिक्षण कार्यक्रमलाई सम्बोधन गर्दै संयोजक प्रचण्डले जेनजी आन्दोलनले उठाएका मुद्दा पूरा गर्न माओवादी केन्द्रको जोड रहने बताए।
‘जेन–जी आन्दोलनले उठाएका मुद्दा हामीले विगत संविधानसभा चुनावदेखि नै उठाउँदै आएका हौं। अब ती मुद्दा पूरा गर्न हाम्रो पहल र जोड हुनेछ,’ उनले भने।
तत्कालीन कामचलाउ प्रधानमन्त्री एवम् नेकपा (एमाले) का अध्यक्ष केपी शर्मा ओलीको सिफारिसमा सुशीला कार्की प्रधानमन्त्री बनेको भन्दै त्यसप्रति माओवादी केन्द्रको समर्थन जनाएको उल्लेख गरे। त्यतिबेला माओवादी केन्द्रको मत संसदबाट अनुमोदन गरेर र संविधान संशोधन गरेर मात्र संसद विघटन गरौं भन्ने रहेको पनि उनले बताए।
‘केपी ओलीको सिफारिसमा राष्ट्रपतिले बनाएको अन्तरिम सरकारप्रति हामीले पनि समर्थन जनाएका थियौं। तर हाम्रो मत संसदबाट अनुमोदन गरेर र संविधान संशोधन गरेर मात्र संसद विघटन गरौं भन्ने थियो। जेनजी आन्दोलन हाम्रा उत्तराधिकारी हुन्। र हामी भ्रष्टाचार, कुशासन र बेथितिविरुद्ध निरन्तर लडिरहेका थियौं,’ उनले भने।
संयोजक प्रचण्डले सबै राजनीतिक दललाई निर्वाचन तयारीमा जुट्न आग्रह पनि गरे।
‘अब चुनाव घोषणा भइसकेको अवस्थामा चुनाव सफल पार्नु नै हाम्रो पहिलो कार्यभार हो। सरकारलाई निष्पक्ष निर्वाचनको वातावरण बनाउन आग्रह गर्दछु। चुनाव हुनेछ कि हुँदैन भन्ने होइन, अब चुनावमा लाग्नु बाहेक कुनै विकल्प छैन,’ उनले भने।
उनले देशभर माओवादी केन्द्रको अभियानप्रति जनविश्वास बढ्दै गएको पनि बताए।
‘हाम्रो पार्टीले अहिले जिल्ला–जिल्ला र गाउँसम्म कार्यक्रम गरिरहेको छ। आम जनताले अबको चुनावबाट देश सम्हाल्न माओवादी नै आउनुपर्छ भनेर विश्वास व्यक्त गरिरहेका छन्,’ उनले भने।
जेनजी पुस्ताले पनि माओवादी केन्द्रलाई अभिभावक मानेको प्रचण्डको दाबी थियो।
‘अब जेन–जी युवाहरूसँग हाम्रो छलफल हुँदै जाँदा उहाँहरू पनि आफ्नो असली अभिभावक माओवादी नै हो भन्ने निष्कर्षमा पुग्दै जानु भएको छ,’ उनले भने।
उनले पार्टीभित्रको एकतालाई सुदृढ बनाउने संकल्प समेत गरे।
‘हाम्रो केन्द्रीय समितिले पार्टीभित्रको एकता विरोधी र नेतृत्व विरोधी प्रवृत्तिलाई एकताबद्ध भएर परास्त गरेको छ। विचार मिल्नेहरूसँग एकता गरिन्छ, तत्काल सम्भव नभए संयुक्त मोर्चा बनाएर अघि बढिन्छ,’ उनले भने।
प्रचण्डले पनि प्रतिगामी खतरा कायम रहेको भन्दै उनीहरू लोकतन्त्र नै खोस्न सकिन्छ कि भनेर लागेकाले त्यस्ता तत्वबाट सावधान रहनुपर्ने बताए।
-copy-1761394385.jpg)
-1756446574.jpg)
-1746009348.jpg)
