राष्ट्रिय स्वतन्त्र पार्टी (रास्वपा)को विस्तारित बैठक सर्ने भएको छ।
रास्वपाले यही कात्तिक १४ र १५ गते काठमाडौंमा बस्ने तय भएको विस्तारित बैठक सार्ने भएको हो।
रास्वपा महामन्त्री कबिन्द्र बुर्लाकोटीका अनुसार बैठकको तयारीका लागि समय नपुगेका कारण सार्न लागिएको हो।
शनिबार भर्चुअल रूपमा बसेको रास्वपा सचिवालय बैठकले त्यसबारेमा छलफल गरेको थियो।
'विस्तारित बैठकमा सहभागिता बढाउने विषयमा कुराकानी भएको थियो। त्यसका लागि समय नपुग्ने भएकाले कात्तिक तेस्रो साता बस्नेगरी बैठक सार्नुपर्ने निष्कर्ष रह्यो,' महामन्त्री बुर्लाकोटीले भने।
यसअघि विस्तारित बैठकमा केन्द्रीय समिति, सल्लाहकार परिषद् र पार्टी विभागका पदाधिकारी तथा जिल्ला सभापतिलाई सहभागी गराउने तय भएको थियो।
अब त्यसमा निर्वाचन क्षेत्रका संयोजकहरू र अधिवेशन भइसकेका पालिकाका सभापतिहरूलाई पनि समेट्ने गरी रास्वपाले तयारी गर्ने भएको छ।
'त्यसरी तयारी गर्दा बैठकमा पाँच सय जनाभन्दा बढीको सहभागिता हुनेछ,' महामन्त्री बुर्लाकोटीले भने।
विस्तारित बैठकको मुलतः महाधिवेशनबारे छलफल गर्न बोलाइएको थियो।
रास्वपा फागुन ७,८ र ९ गते पहिलो महाधिवेशन गर्ने तयारीमा थियो। तर फागुन २१ गते चुनाव हुनेगरी मिति घोषणा भएकाले महाधिवेशन सार्ने विषयमा विस्तारित बैठकले छलफल गर्नेछ।
बैठकले महाधिवेशन अगाडि सार्ने कि पछाडि धकेल्ने भन्ने विषयमा निर्णय गर्नेछ।
'एजेन्डा चाहिँ महाधिवेशन नै हो। सँगसँगै पार्टी निर्माण, अहिलेको परिस्थितिबारे छलफल हुन्छ,' महामन्त्री बुर्लाकोटीले भने।
1635339834.jpeg)
-1746009348.jpg)
