गृहमन्त्री ओमप्रकाश अर्यालले केही तत्वहरू निर्वाचनको बिथोल्न सक्रिय भएको आरोप लगाएका छन्।
जिल्ला समन्वय समिति भक्तपुरको कार्यलय अनुगमनको क्रममा सञ्चारकर्मीहरूसँग कुरा गर्दै उनले निर्वाचनको माहोल बिगार्न लाग्नेहरूलाई सरकारले सम्झाइबुझाइ गर्ने बताए।
सम्झाउँदा नमानेमा सरकारले आफ्नो ढंगबाट काम गर्ने उनको भनाइ छ।
वर्तमान सरकार स्वतन्त्र र निष्पक्ष ढंगबाट निर्वाचन गराउन बनेको उल्लेख गर्दै उनले तोकिएकै मितिमा सरकारले निर्वाचन गराउने दाबी गरे।
निर्वाचनको लागि सरकारले सरोकारवाला सबैलाई संवादमा आउन आह्वान गरेको समेत जिकिर गरे।
उनका अनुसार राजनीतिक दलहरूले भने सरकारले आफूहरूलाई बेवास्ता गरेको आरोप लगाउने गरेका छन्।
उनले भने, ‘निर्वाचनको लागि सबै संवादमा आउनु पर्यो। स्टेक होल्डरहरू संवादमा आउनुपर्यो। सरकारले संवादमा सहजीकरण गर्छ। राष्ट्रपतिज्यूले पनि संवाद सुरू गरिसक्नुभएको छ। हामीले हाम्रो तहबाट पनि संवादको लागि आह्वान गरिरहेका छौँ। यो स्थितिमा स्टेक होल्डर कसैले पनि परिस्थितिलाई भड्काउने काम गर्नुभएन। सरकारले निर्वाचन जसरी नि गराउँछ, तोकिएकै मितिमा गराउँछ।’
उनले प्रहरी कर्मचारी लगायतको मनोबल उकास्ने काम पनि सरकारले गरिरहेको बताए।
व्यापक राजनीतिक हस्तक्षेप भएको कारण प्रहरीको मनोबल गिरेको दाबी गर्दै उनले वर्तमान सरकारले उठाउने कोसिस गरिरहेको बताए।
राजनीतिक दलहरूले प्रहरीको दुरूपयोग गरेको उनको भनाइ थियो। – न्युज एजेन्सी नेपाल
1635339834.jpeg)
-1746009348.jpg)
