मुख्यमन्त्री जितेन्द्र प्रसाद सोनार (सोनल) ले आफू रमाइलोका लागि नभई काम गर्न आएको बताएका छन्।
पद तथा गोपनीयताको शपथ लिएलगत्तै सञ्चारकर्मीहरूलाई संक्षिप्त प्रतिक्रिया दिँदै उनले त्यस्तो बताएका हुन्।
‘पदलाई इन्जोय गर्न हैन, सेवा गर्न आएको हो। काम गर्न आएको हो, तपाईंहरूलाई थाहा छ, मन्त्री हुँदा १६, १७, १८ घण्टा काम गरेको हो,’ मुख्यमन्त्री सोनलले भने।
भोजपुरी भाषामा शपथ लिएका मुख्यमन्त्री सोनलले सञ्चारकर्मीलाई प्रतिक्रिया दिँदा अंग्रेजी शब्द मिसाएका थिए।
उनले आफू देवता नभई मानिस भएको बताउँदै कुनै कमीकमजोरी भएको खण्डमा जानकारी गराउन आग्रह गरे।
‘म मान्छे हो देवता हैन, काम गर्ने बखतमा केही सुविधा, असुविधा कमीकमजोरी भयो भने व्यक्तिगत र सामूहिक रूपमा बताउनुहोला,’ उनले भने।
अधिकारका कुराहरूलाई संरक्षण गर्दै समृद्धिको बाटोमा अघि बढ्ने प्रतिबद्धता उनले जनाए।
उनले विषम परिस्थितिमा मुख्यमन्त्री बनेको बताउँदै जेनजी आन्दोलनबाट उत्पन्न परिस्थितिलाई सम्हाल्दै अघि बढ्नुपर्ने आवश्यकता रहेको बताए।
‘जेनजीको मुभमेन्टबाट जनस्तरमा जुन कुरा छ, त्यसलाई कसरी सम्बोधन गर्ने? जनताको मत कसरी जित्ने? सरकारको सर्भिस डेलिभरीलाई कसरी चुस्त दुरूस्त बनाउने? सुशासन कसरी कायम गर्ने? राष्ट्रिय राजनीतिमा विकसित घटना क्रममा प्रदेशका तर्फबाट संघीय लोकतान्त्रिक गणतन्त्रलाई संरक्षण सुरक्षण संस्थागत गर्दै कसरी अगाडि बढ्ने? सम्पूर्ण सहिदहरू मधेस आन्दोलन, ऐतिहासिक जनआन्दोलन, माओवादी जनविद्रोह, अग्रगामी परिवर्तनकारी आन्दोलनहरू, जेनजी आन्दोलनका सहिदहरूले जुन सपना देखेका छन्, त्यसलाई पूरा गर्नुछ, ’ उनले भने।
सरकारले संघीय लोकतान्त्रिक गणतन्त्रलाई संस्थागत गर्ने, निमुखा जनतालाई अधिकार सम्पन्न बनाउने, सर्भिस डेलिभरीको सवालमा चुस्त दुरूस्त हुने, सुशासन कायम गर्ने सवाललाई प्राथमिकतामा राख्ने मुख्यमन्त्री सोनलको भनाइ छ।
‘मधेस प्रदेशलाई विकास र समृद्धिको बाटोमा कसरी डोर्याउने? आजको मुख्य चुनौती त्यही हो। दृढताको साथ अघि बढ्छौं, त्यसका लागि गठबन्धन अहोरात्र खट्नेछ,’ मुख्यमन्त्री सोनलले भने।
बुधबार मुख्यमन्त्रीमा नियुक्त भएका मुख्यमन्त्री सोनललाई बिहीबार प्रदेश प्रमुख सुमित्रा सुवेदी भण्डारीले पद तथा गोपनीयताको शपथ ग्रहण गराएकी थिइन्।
1635339834.jpeg)
-1746009348.jpg)
