नेपाली कांग्रेसको केन्द्रीय समिति बैठक असोज २८ गते बस्ने भएको छ।
असोज २६ देखि केन्द्रीय समिति बैठक तय भए पनि केन्द्रीय कार्यसम्पादन समिति बैठक नसकिएकोले केन्द्रीय समिति बैठक सरेको हो।
पार्टी प्रवक्ता प्रकाशशरण महतले असोज २८ गते केन्द्रीय समिति बैठक बस्ने जानकारी दिए।
शनिबार बसेको केन्द्रीय कार्यसम्पादन समिति बैठकमा महाधिवेशन विधि, प्रक्रियासम्मत तवरले गर्नेबारे पनि छलफल भएको महतले बताए।
साथै प्रतिनिधि सभाको निर्वाचन र संसद पुनःस्थापनाको विषयमा छलफल भएको उनले बताए। यसबारेमा केन्द्रीय समितिमा छलफल गरेर निष्कर्ष निकाल्ने महतले बताए।
केन्द्रीय समिति बैठकबाटै राजनीतिक मुद्दाहरुमा पनि कांग्रेसले स्पष्ट धारणा राख्ने उनले बताए।
उनका अनुसार आइतबार पनि कार्यसम्पादन समितिको बैठक बस्ने र केन्द्रीय समितिको एजेण्डाबारे छलफल हुनेछ।
प्रवक्ता महतले संसद विघटन असंवैधानिक भएको पनि बताए।
निर्वाचनमा जाने कुरा पनि राजनीतिक दृष्टिकोणबाट जायज रहेको बताउँदै सरकारले गम्भीरतापूर्वक काम नगरेको उनको आरोप थियो।
उनले गत भदौ २३ र २४ गतेको घटनालाई गहिराईमा गएर छलफल गरेको बताए।
सुशासन र सामाजिक सञ्जाल खोल्ने कुरामा केन्द्रित आन्दोलन भए पनि दोस्रो दिनको आन्दोलनले जटिलता उत्पन्न गरेको भन्ने ढंगको छलफल भएको उनले बताए।
यसले राष्ट्रिय र राजनीतिक दलहरुको जीवनमा पनि ठूलो असर पारेको उनको भनाइ छ।
—न्युज एजेन्सी नेपाल
-1746009348.jpg)
