इसराइलको मन्त्रिपरिषदले गजामा युद्धविराम गर्ने सहमतिलाई अनुमोदन गरेको छ।
बिहीबार इजिप्टमा भएको छलफलपछि युद्धविराम घोषणा भएको थियो। इसराइलले बिहीबारकै मन्त्रिपरिषदमा युद्धविराम सहमतिलाई अनुमोदन गर्ने प्रस्ताव लगेको थियो।
सो प्रस्ताव अनुमोदन भएको अमेरिकी पत्रिका द न्यूयोर्क टाइम्सले जनाएको छ।
अमेरिकी राष्ट्रपति डोनाल्ड ट्रम्प र हमासका वरिष्ठ वार्ताकार खालिल अल–हय्याले पहिलो चरणको युद्धविराम भएको भनेका छन्।
ट्रम्प यही साताको अन्त्यमा मध्यपूर्वको भ्रमणमा निस्कन लागेको पनि न्यूयोर्क टाइम्सले जनाएको छ।
त्यहाँ इसराइल र हमासबीच हुने हस्ताक्षर समारोह सहभागी हुन लागेको भनेर टाइम्सले लेखेको छ।
ट्रम्पले आइतबारसम्म मध्यपूर्व पुगिसक्ने र सोमबार वा मंगलबारदेखि बन्धक र कैदी छाड्ने क्रम सुरू हुने भनिएको छ।
युद्धविराम प्रारम्भ भएको ७२ घन्टाभित्र हमासले सबै बन्धकहरूलाई छाडिसक्नुपर्नेछ।
मृत्यु भएका बन्धकहरूको शव भने हस्तान्तरण गर्न केही समय लाग्न सक्ने भनिएको छ।
विपिन जोशीको स्थिति अज्ञात, यी हुन् जीवित र मृत्यु भएको आकलन गरिएका बन्धकहरू
इसराइल र हमासबीच युद्धविराम घोषणा भइसकेको छ।
इजिप्टमा भएको अप्रत्यक्ष वार्तापछि बिहीबार इसराइल र हमासबीच झन्डै २ वर्षदेखि जारी युद्ध अन्त्य गर्ने सहमति भएको हो।
युद्धविराम सहमतिसँगै अर्को साताबाट गजामा हमासको कब्जामा रहेका बन्धकहरूलाई छाडिने भनेर विभिन्न अन्तर्राष्ट्रिय सञ्चारमाध्यमहरूले जनाएका छन्।
युद्धविराम घोषणापछि बिहीबार इसराइलको राजधानी तेल अविभस्थित होस्टेज स्क्वायरमा बन्धकका परिवार उपस्थित भएर उत्सव मनाएका थिए।
हमासले बन्धकहरू छाड्दा इसराइलले प्यालेस्टिनी केदीहरूलाई जेलमुक्त गर्ने सहमति छ। साथै गजाबाट इसराइली सेना फिर्ता हुने र त्यहाँ कुनै पनि किसिमको आक्रमण इसराइलले नगर्ने सहमति छ। यो सहमतिपछि बिहीबार गजामा पनि त्यहाँका जनताहरूले उत्सव मनाएका थिए।
गजामा ४८ बन्धक हमासको कब्जामा रहेको यकिन भइसकेको छ।
तीमध्ये २० जना जीवित रहेको भनेर शान्ति वार्ताबारे जानकारी राख्ने एक अधिकारीसँग कुराकानी गरेर अमेरिकी पत्रिका न्यूयोर्क टाइम्सले बिहीबार नै पुष्टि गरेको थियो।
ती जीवित रहेको आकलन गरिएको बन्धकहरू को-को हुन् भनेर अमेरिकी टेलिभिजन नेटवर्क सिएनएनले शुक्रबार सूची सार्वजनिक गरेको छ।
जीवित रहेका बन्धकहरूमा २१ वर्षीय मतन अंग्रेस्त,२७ वर्षीय जिव बरम्यान, २७ वर्षीय गाली बरम्यान, ३४ वर्षीय एलकाना बोहबोट, २१ वर्षीय रोम ब्राजलव्स्की,२० वर्षीय निमरोड कोहेन,२७ वर्षीय गुए गिल्बोओ दलाल, ३६ वर्षीय माक्सिम हरकिन, ३८ वर्षीय एइटन हर्न, २७ वर्षीय सेगेव कालफोन, २३ वर्षीय बार कुपरस्टेन, ४७ वर्षीय ओमरी मिरन, २४ वर्षीय एइटन अब्राहम मोर, २४ वर्षीय योसेफ चेम ओहाना, २३ वर्षीय एलन ओहेल, ३१ वर्षीय एभिनाटन ओर र २५ वर्षीय माटन जंगुकर छन्।
उनीहरू कुन देशका नागरिक हुन् भन्ने चाहिँ सिएनएनले खुलाएको छैन।
बाँकी रहेका २८ बन्धकमध्ये नेपालका विपिन जोशी र २० वर्षीय तामिर निम्रोडीको स्थिति अज्ञात रहेको भनेर सिएनएनले लेखेको छ।
बुधबार मात्रै उनको परिवारले दुई वर्ष अगाडि रेकर्ड गरिएको विपिनको भिडिओ सार्वजनिक गरेका थिए।
उक्त भिडिओ इसराइलले विपिनका परिवारलाई उपलब्ध गराएको थियो। अक्टोबर ७, २०२३ मा हमासले बन्धक बनाएर गजा पुर्याएपछि नोभेम्बरमा उक्त भिडिओ खिचिएको थियो भनेर इसराइली अनलाइन पत्रिका द जेरूसलेम पोस्टले पुष्टि गरेको थियो।
बुधबार इजिप्टमा इसराइल र हमासबीच वार्ता हुँदै गर्दा युद्धविरामका लागि दबाब होस् भनेर पुरानो भिडिओ सार्वजनिक गरिएको विपिनकी बहिनी पुष्पाले जेरूसलेम पोस्टसँग बताएकी थिइन्।
इसराइलका लागि नेपालका राजदूत प्रा. डा. धनप्रसाद पण्डितले सेतोपाटीसँग कुरा गर्दै विपिनबारे अहिलेसम्म कुनै जानकारी नआएको भनेर सेतोपाटीसँग बताएका थिए।
जीवित रहेको भनिएका बन्धकहरू-
अज्ञात-
मृत्यु भएको भनिएका बन्धकहरू-
स्रोतः सिएनएन।
-1746009348.jpg)
