नेकपा (माओवादी केन्द्र)को महाधिवेशन आयोजक समितिको सचिवालय बैठक केही बेरमात्रै बस्यो।
महाधिवेशनसम्बन्धी कार्यविधि तयार पार्ने र महाधिवेशन आयोजक समितिलाई पूर्णता दिने विषयमा छलफल गर्न बोलाइएको बैठक केन्द्रीय कार्यालय पेरिसडाँडामा सोमबार दिउँसो साढे १ बजेपछि सुरू भएको थियो।
बैठक छोटो छलफलपछि सकिएको प्रवक्ता अग्नी सापकोटाले जानकारी दिए।
बैठकमा बाढी पहिरोको घटनामा उद्धार तथा राहतबारे समीक्षा भएको त्यसमा संलग्न सबै पक्षलाई धन्यवाद दिइएको सापकोटाले बताए।
त्यस्तै महाधिवेशनसम्बन्धी कार्यविधि बनाउन र महाधिवेशन आयोजक समितिलाई पूर्णता दिन असोज २३ गते पुनः बैठक बोलाइएको पनि प्रवक्ता सापकोटाले जानकारी दिए।
आजको बैठकको एजेन्डामा विभिन्न पार्टीसँग एकता गर्ने विषय पनि थियो।
महाधिवेशन आयोजक समिति संयोजक पुष्पकमल दाहाल 'प्रचण्ड'ले विभिन्न दलहरूसँग एकताको पहलबारे ब्रिफिङ समेत गरेका थिए।
माओवादीले समाजवादी मोर्चामा आबद्ध दल र पूर्वमाओवादी घटकहरूसँगको एकतालाई प्राथमिकताका साथ पहल गरिरहेको छ।
त्यसबारेमा प्रचण्डले एकताको प्रयास सकारात्मक दिशातर्फ उन्मुख भएको र चाँडै निष्कर्षमा पुग्ने ब्रिफिङ गरेका थिए।
'एकताबारे सकारात्मक छ। एकता चुनावअघि नै हुन पनि सक्छ। त्यसका लागि सघन छलफल चलिरहेको छ। निष्कर्षमा भने पुगिसकिएको छैन भन्ने उहाँको ब्रिफिङ थियो,' प्रवक्ता सापकोटाले भने।
समाजवादी मोर्चामा अशोक राई नेतृत्वको जनता समाजवादी पार्टी (जसपा)लाई पनि सहभागी गराउने विषयमा सघन छलफल भइरहेको प्रवक्ता सापकोटाले बताए।
अर्का नेता लिलामणि पोख्रेलले पनि केही एकीकृत समाजवादीलगायतका दलहरूसँग पार्टी एकताका विषयमा सकारात्मक छलफल भएको भनेर प्रचण्डले ब्रिफिङ गरेको जानकारी दिए।
'एकताबारे संवाद भइरहेको छ। छलफल भइरहेको छ। छिट्टै सकारात्मक टुंगोमा पुग्न सक्ने सम्भावना छ भन्नुभयो,' उनले भने।
नेता पोख्रेलका अनुसार एकीकृत समाजवादी, विप्लव नेतृत्वको नेकपा, महेन्द्र राय नेतृत्वको नेपाल समाजवादी पार्टी, प्रेमबहादुर सिंह, अशोक राईको पार्टीसँग पनि एकताको पहल भइरहेको छ।
केही दलमा नेताहरू एकताको विपक्षमा रहे पनि मूल नेतृत्व एकताकै पक्षमा रहेकाले छलफल सघन रूपमा अगाडि बढेको नेता पोखरेलले बताए।
-1746009348.jpg)
