केन्द्रीय नेताहरुले चाहेका व्यक्तिलाई जिल्ला नेतृत्वमा ल्याउनकै लागि नेकपा एकीकृत समाजवादी मोरङको अधिवेशन लम्बिएको लम्बियै छ।
अध्यक्ष माधवकुमार नेपालले चैत १९ मा विराटनगरमा उद्घाटन गरेको एकीकृत समाजवादीको नवौं जिल्ला अधिवेशन दुई दिनसम्म चल्ने कार्यक्रम थियो। चैत १९ मा उद्घाटन कार्यक्रम हुने र २० गते नेतृत्व चयन गरेर सकिने भनिएको अधिवेशनले अझै जिल्लाको नेतृत्व छान्न सकेको छैन।
जिल्ला अधिवेशनका लागि प्रतिनिधि बनेर आएकाहरुले निर्वाचनमार्फत नयाँ नेतृत्व चयन गर्नुपर्ने माग गरका थिए। तर, केन्द्रीय नेताहरुले चुनावी प्रतिस्पर्धा रोक्दा पाँच दिनसम्म पनि समाजवादीले जिल्ला नेतृत्व छान्न सकेको छैन।
मंगलबार सुरु भएको अधिवेशनमा सहभागी हुन आएका प्रतिनिधिहरु बुधबार नै घरतिर लागिसकेका छन्।
‘केन्द्रका नेताहरुले चाहे अनुसारको नेतृत्व छान्नलाई अहिले तयारी भइरहेको छ’, समाजवादीका एक कार्यकर्ताले भने, ‘त्यो पनि सकिएको छैन।’
एकीकृत समाजवादीको मोरङ अध्यक्षमा नौ जनाले उम्मेद्वारी दर्ता गराएका थिए। अन्य पदमा पनि एकभन्दा बढी उम्मेद्वारी परेपछि मनोनयन सूची सार्वजनिक नगरी अध्यक्षमण्डलले आफूखुसी नेता चयन गर्ने बाटो रोजेको थियो।
पार्टी सचिव बलदेव चौधरी नेतृत्वको अध्यक्ष मण्डलले अध्यक्षका नौ मध्ये तीन जना दाबेदारहरुलाई अध्यक्ष र उपाध्यक्षमा राखेर नाम घोषणा गर्ने तयारी गरेको छ। तर, अझै सहमति हुन नसकेका कारण नाम घोषणा नभएको कार्यकर्ताहरुले बताएका छन्।
अध्यक्ष मण्डलमा रहेका एक नेताका अनुसार अहिलेकै जिल्ला अध्यक्ष चन्द्रवीर राईलाई अध्यक्ष र अध्यक्षका अन्य दुई दाबेदारहरु उद्धव पोखरेल र दीपक ढकाललाई उपाध्यक्ष राखेर नाम घोषणा गर्ने तयारी भइरहेको छ। तर, प्रतिनिधिहरुले यदि त्यस्तो घोषणा भए अस्वीकार गर्ने चेतावनी दिएपछि अध्यक्ष मण्डलले नाम घोषणा नगरेको हो।
अध्यक्ष मण्डलले सचिवमा तुलसी ढकाल, उपसचिवमा भूपाल बस्नेत, डिबी थापा र सुमित्रा राईको नाम घोषणा गर्ने तयारी गरेको छ।
सहमतिका नाममा आन्तरिक प्रतिस्पर्धा निषेध गरेको भन्दै एकीकृत समाजवादीमा तीव्र असन्तोष छ।
‘ओलीको जे-जे शैलीको विरोध गरेर नयाँ पार्टी बनाएको हो, ठीक त्यही-त्यही शैली अपनाइएको छ’, एक प्रतिनिधिले भने, ‘केन्द्रका नेताले चाहेकाहरुलाई बनाउन अधिवेशनलाई भूमिकाहीन बनाइयो।’
केपी शर्मा ओलीको कार्यशैलीको विरोध गर्दै एमालेबाट विभाजित बनेको एकीकृत समाजवादीले पार्टी महाधिवेशनमा पनि नेताहरुले चाहेकै व्यक्तिहरु पर्ने गरी नाम घोषणा गरेको थियो। पछि नेताहरु आफैले छानेको केन्द्रीय कमिटीका सदस्यहरुले मत हालेर पोलिटब्युरो छानेका थिए।
