राष्ट्रिय स्वतन्त्र पार्टी (रास्वपा)का उपसभापति स्वर्णिम वाग्लेले सरकारले बदला लिने नियतले आफ्नो पार्टीका सभापति रवि लामिछानेलाई पक्राउ गरिएको बताएका छन्।
शनिबार चितवनबाट रास्वपाले शुभारम्भ गरेको जनयात्रालाई सम्बोधन गर्दै उपसभापति वाग्लेले सेखी झार्ने र बदल लिने नियतले नै रवि लामिछानेलाई रातारात बेडरूमबाट पक्राउ गरिएको बताएका हुन्।
'यसअघि हिरासतमा राख्दा पनि यस्तै गरिएको थियो। त्यसैलाई पुनरावृत्त गर्न खोजिएको छ,' उनले भने।
अदालतको आदेशपछि जानकारहरूसँग कुरा गर्दा उच्च अदालतले जिल्ला अदालतलाई जानकारी गराउने र त्यसपछि प्रहरी हुँदै प्रक्रियामा जान्छ भन्ने बुझेको उनले बताए।
'त्यसो हुँदा सोमबारसम्म समय हुने र तारेख बुझ्न जाँदा सभापति लामिछानेले आफै जानकारी गराउन सक्ने भनिएको थियो। तर उल्टो भयो,' उनले भने।
तर लामिछाने हतास नभएको वाग्लेले बताए।
उपसभापति वाग्लेले सत्तामा रहेका ठूला दलहरू डराएर रास्वपाको नेतृत्वमाथि प्रहार गरेको बताए। त्यसभित्रको अंकगणितबारे आफू जानकार रहेको पनि उनको भनाइ छ।
'वर्षौं राजनीति गरेका उनीहरूको मत आउने २५/२६ लाख हो। रास्वपाले पाँच महिनामै ११/१२ लाख मत ल्यायो। भोलि रास्वपाले बढाएर १७/१८ लाख पुर्याउला र उनीहरूको घटेर १६/१७ लाखमा आउला भन्ने डर छ,' उनले भने।
ठूला दलहरूले रास्वपाको नेतृत्वलाई पटक-पटक टार्गेट गरेको बताए।
'नेताहरु कांग्रेस र एमालेमा जाँदैछन् भनेर अफवाह फैलाए। नयाँ दलहरू माथी लाग्ने बुझेर गौँडा गौँडामा रोक्न खोजेका छन्,' उनले भने।
वाग्लेले रणनीति बनाएर गए ०८४ मा ती दलहरूलाई पत्तासाफ गर्न सकिने बताए। त्यस्तो भए ०८४ मा रास्वपासँग डराएर कांग्रेस र एमालेले मिलेर चुनाव लड्ने उनको दाबी थियो।
