प्रधानमन्त्री केपी शर्मा ओलीले भारतको औपचारिक भ्रमण बाहिर प्रचार गरिएजस्तो असम्भव नरहेको बताएका छन्।
थाइल्याण्डको औपचारिक भ्रमण सकेर शनिबार स्वदेश फर्किएका प्रधानमन्त्री ओलीले विमानस्थलमा पत्रकार सम्मेलनमा भारत भ्रमण यसअघि पनि असम्भव नभएको र आगामी दिनमा पनि असम्भव नहुने बताएका हुन।
'भारत भ्रमण तपाईंहरुले भनेजस्तो असम्भव थिएन। काँडेतार लगाएको छ र कसैले?,' उनले भने।
यद्यपि ओली असारमा प्रधानमन्त्री बनेयता भारतको औपचारिक भ्रमणमा गएका छैनन्। विभिन्न अन्तर्राष्ट्रिय फोरमहरूमा प्रधानमन्त्री ओली र भारतका प्रधानमन्त्री नरेन्द्र मोदीबीच भने भेट भइरहेको छ।
गत सेप्टेम्बरमा संयुक्त राष्ट्रसंघको महासभाको साइडलाइनमा पनि दुई प्रधानमन्त्रीबीच भेटवार्ता भएको थियो। थाइल्याण्डमा बिमस्टेकको साइडलाइनमा पनि शुक्रबार प्रधानमन्त्री ओली र मोदीबीच कुराकानी भएको थियो।
शुक्रबार झन्डै ४५ मिनेट उनीहरूबीच वार्ता र छलफल भएको थियो।
शनिबार पत्रकारहरूले अब प्रधानमन्त्रीको भारत भ्रमण चाँडै हुन्छ? भनी प्रश्न गरेका थिए।
जबाफमा प्रधानमन्त्री ओलीले सगरमाथा संवाद लगायत विभिन्न कामहरूमा व्यस्तता बढ्न भएकाले नेपालकै तर्फबाट भ्याउने नभ्याउने टुंगो नभएको बताए।
'हामी अलिकति व्यस्त छौं। त्यसकारण हाम्रै तर्फबाट के हुन सक्छ। हामीले भ्याउँछौं भन्यौं भने हुन पनि सक्छ,' प्रधानमन्त्री ओलीले भने।
शुक्रबार भएको भेट अत्यन्तै राम्रो, हार्दिकता र सुमधर वातावरणमा भएको उनले बताए।
'सेप्टेम्बरमा पनि नराम्रो भएको होइन। फ्रेन्ड्ली कुराकानी गर्यौं। यसपटक त्यो भन्दा बढी कुराकानी। लगानी व्यापारका क्षेत्रहरू, पञ्चेश्वर, दोधारा चाँदनीमा महाकालीबाट सिँचाई गर्ने कुराहरू लगायत पारस्परिक हितका विषमा कुराकानी भए। व्यापकै क्षेत्रमा कुराकानी भएको छ,' उनले भने।
छलफलबाट नेपाल-भारत सम्बन्धलाई अझै व्यापक, विस्तृत र सुदृढ बनाउने अठोट भएको पनि प्रधानमन्त्री ओलीले बताए।
'कुनै सानातिना समस्या भइहाले संवाद गरेर टुंग्याइहाल्ने गहिरो समझदारी भएको छ,' उनले भने।
