राष्ट्रिय स्वतन्त्र पार्टी (रास्वपा)का सभापति रवि लामिछानेलाई भैरहवा ल्याइएको छ।
शुक्रबार काठमाडौंमा पक्राउ गरी उनलाई यति एयरलाइन्सको जहाजबाट भैरहवा ल्याइएको हो।
उनलाई अहिले भैरहवास्थित रूपन्देही जिल्ला प्रहरी कार्यालय पुर्याइएको छ।
लामिछाने शनिबार र आइतबार नै जिल्ला प्रहरीको हिरासतमा रहने रूपन्देहीका प्रहरी प्रमुख एसपी रञ्जितसिंह राठौरले जानकारी दिए।
उनका अनुसार आज शनिबार र भोलि सरकारी बिदा भएकाले अदालत नखुल्ने भएकाले दुई दिन लामिछाने जिल्ला प्रहरीकै हिरासतमा रहनेछन्।
‘सोमबार मात्रै बाँकी प्रक्रिया सुरू हुन्छ,’ एसपी राठौरले भने।
सोमबार अदालत खुलेपछि लामिछानेलाई अदालतमा हाजिर गराइन्छ। अदालतले थुनामा पठाउने अनुमति दिएपछि लामिछानेलाई कारागार चलान गरिने उनले बताए।
रास्वपाले न्यायका लागि अर्को तहमा अपिल गर्ने निर्णय गरेको छ।
बुटवलको सुप्रिम सहकारीको बचत अपचलन र संगठित अपराध मुद्दामा लामिछानेलाई शुक्रबार उच्च अदालत तुलसीपुरको बुटवल इजलासले थुनामा पठाउन आदेश गरेको थियो।
जिल्ला अदालत रूपन्देहीले यसअघि एक करोड धरौटीमा छाड्ने आदेश बदर गरी साधारण तारेखमा छाड्न माग गर्दै लामिछानेले उच्च अदालतमा पुनरावेदन दिएका थिए।
शुक्रबार उच्चका न्यायाधीशद्वय रमेश ढकाल र स्विकृती पराजुलीको इजलासले जिल्लाको आदेश उल्ट्याएर लामिछानेलाई थुनामा पठाएर मुद्दाको पुर्पक्ष गर्न आदेश दिएको थियो।
अदालतको आदेशसँगै काठमाडौं उपत्यका अपराध अनुसन्धान कार्यालय र प्रहरी वृत्त महाराजगन्जको टोलीले शुक्रबार लामिछानेलाई घरबाटै पक्राउ गरेको थियो।
