प्रधानमन्त्री केपी शर्मा ओली र भारतीय प्रधानमन्त्री नरेन्द्र मोदीबीच थाइल्याण्डमा भेटवार्ता भएको छ।
शुक्रबार अपराह्न भएको भेटवार्तापछि भारतीय प्रधानमन्त्री मोदीले भेटघाट फलदायी भएको उल्लेख गरेका छन्।
‘प्रधानमन्त्री केपी शर्मा ओलीसँग बैंककमा भेटवार्ता फलदायी भयो, हामीले भारत-नेपाल सम्बन्धका विभिन्न पक्षहरूमा छलफल गर्यौं,’ भेटवार्ताको तस्बिर सामाजिक सञ्जाल फेसबुकमा राख्दै भारतीय प्रधानमन्त्री मोदीले भनेका छन्।
उनीहरूबीच कनेक्टिभिटी, ऊर्जा, सूचना प्रविधिलगायत विभिन्न क्षेत्रहरूमा रहेर कुराकानी भएको थियो।
उनीहरूले बिमस्टेक शिखर सम्मेलनका उपलब्धि विपद् व्यवस्थापन र समुद्री यातायातका क्षेत्रबारे पनि कुराकानी गरेका थिए।
बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिम्स्टेक) को सम्मेलनमा सम्बोधन गर्न बैंकक रहेका बेला प्रधानमन्त्री ओली र भारतीय प्रधानमन्त्री मोदीबीच भेटवार्ता भएको हो।
प्रधानमन्त्री ओली गत मंगलबार थाइल्याण्ड गएका थिए।
थाइल्याण्डको औपचारिक भ्रमण र बिम्स्टेक सम्मेलनमा भाग लिन प्रधानमन्त्री ओली थाइल्याण्ड गएका थिए। सो क्रममा विभिन्न देशका सरकार प्रमुखहरूसँग प्रधानमन्त्री ओलीले भेटवार्ता गरेका हुन्।
यसअघि प्रधानमन्त्री ओली र भारतीय प्रधानमन्त्री मोदीबीच गत असोज ७ गते अमेरिकाको न्युयोर्कमा भेटवार्ता भएको थियो।
संयुक्त राष्ट्रसंघको महासभामा सहभागी हुन गएका प्रधानमन्त्री ओली र भारतीय प्रधानमन्त्री मोदीबीच मोदी बसेकै होटल लोटे न्युयोर्क प्यालेसमा करिब ३० मिनेट कुराकानी भएको थियो।
