राष्ट्रिय प्रजातन्त्र पार्टीले तीनकुने घटनामा सरकारले दमन गरेको भन्दै राष्ट्रिय मानवअधिकार आयोगको ध्यानाकर्षण गराएको छ।
शुक्रबार राप्रपाका नेताहरू कार्यालयमा पुगेर ध्यानाकर्षण पत्र बुझाएका हुन्।
उनीहरूले सरकारले चैत १५ गते भएको तीनकुने घटनामा सरकारले दमन, घुसपैठ र झुटा मुद्दामा आफ्ना नेताहरूलाई पक्राउ गरेको भन्दै आयोगलाई जानकारी गराएको हो।
राप्रपा महामन्त्रीद्वय राजेन्द्र गुरुङ र शरदराज पाठक, प्रबक्ता मोहन कुमार श्रेष्ठ, मुख्य सचिव केदारबहादुर अधिकारी, केन्द्रीय नेताहरू अमृत पुडासैनी, निरुपमा यादव, खुस्बु ओली, उद्धवराज भेटवाल, सजिना कार्की, रविकिरण हमाल लगायत आयोगमा पुगेका थिए।
उनीहरूले आयोगका अध्यक्ष तपबहादुर मगर, सचिव मुरारी खरेल लगायतसँग छलफल गरेको छ।
‘प्रदर्शनकारीहरूले आफ्नो सभा सुरू गर्ने क्रममा राष्ट्रिय गान गाउन सुरू गरेको बेला प्रशासनले मञ्चलाई लक्षित गरेर सर्वसाधारणको घरको छतबाट अन्धाधुन्ध म्याद सकिएका अश्रु ग्यासका सेलहरूको वर्षा गर्नु, सबिन महर्जनलाई ताकेर गोलिहानी हत्या गरिनु, आँखै अगाडि घर आगलागी हुँदा र उक्त घरमा मानिस रहेको जानकारी पाउँदा पनि नियन्त्रण र उद्धार गर्न नसकेर पत्रकार सुरेश रजकको ज्यान जानु,’ ध्यानाकर्षण पत्रमा भनिएको छ।
त्यस्तै रेबिका खत्री र उनका दाइलाई पनि गोली हान्नु असामान्य भएको ध्यानाकर्षणमा भनिएको छ।
‘कार्यक्रमसँग कुनै सम्बन्ध नरहेका र कार्यक्रम स्थलबाट धेरै टाढा रहेका रेविका खत्री र उनका दाइलाई गोली हान्नु, प्रहरीले अलग अलग ठाउँमा चलाएको गोलीबाट दुई दर्जनभन्दा बेसी मानिसहरू घाइते हुनु असामान्य अवस्था हो,’ ध्यानाकर्षणमा भनिएको छ।
शुक्रबार नै राष्ट्रिय मानव अधिकार आयोगका प्रतिनिधि मण्डल जिल्ला प्रहरी परिसर काठमाडौंमा पुगेको थियो। उक्त टोलीले अनुगमन गरेको थियो।
राप्रपाका वरिष्ठ उपाध्यक्ष रवीन्द्र मिश्र र सांसद धवलशमशेर जबरा पनि पक्राउ परेका छन्।
-1743762486.jpg)
