प्रतिनिधि सभाको राज्य व्यवस्था तथा सुशासन समितिले काठमाडौंको तीनकुनेमा अबदेखि कुनै पनि कार्यक्रम गर्न अनुमति नदिन प्रधानमन्त्री तथा मन्त्रिपरिषद कार्यालय र गृह मन्त्रालयलाई निर्देशन दिएको छ।
समितिको शुक्रबारको बैठकमा सांसदहरूले त्रिभुवन अन्तर्राष्ट्रिय विमानस्थल, पेट्रोल पम्पहरू, सञ्चार गृहहरू रहेको तीनकुने क्षेत्रमा कार्यक्रमका लागि अनुमति दिएको विषयमा प्रश्न उठाएका थिए।
जिल्ला प्रशासन कार्यालय काठमाडौंले दुर्गा प्रसाईंलाई चैत १५ गते तीनकुनेमा कार्यक्रम र प्रदर्शन गर्न अनुमति दिएको थियो।
राज्य व्यवस्था समितिले अबदेखि तीनकुनेमा कुनै पनि कार्यक्रम आयोजना गर्न अनुमति नदिन प्रधानमन्त्री तथा मन्त्रिपरिषद कार्यालय र गृह मन्त्रालयलाई निर्देशन दिएको हो।
समिति बैठकमा सांसदहरूका प्रश्नमा जबाफ दिएका गृहमन्त्री रमेश लेखकले विगतमा तीनकुनेमा कार्यक्रम गर्न दिने गरेको भन्दै अबदेखि त्यस्तो अनुमति नदिइने बताएका थिए।
