सशस्त्र प्रहरी महानिरीक्षक (आइजिपी) राजु अर्यालले चैत १५ गते तीनकुनेमा न्यून क्षतिमा भिड नियन्त्रण प्रयास गरेको बताएका छन्।
प्रतिनिधि सभाको राज्य व्यवस्था तथा सुशासन समितिको शुक्रबारको बैठकमा बोल्दै उनले सबै सुरक्षा निकायहरूले त्यस दिन राम्रो काम गरेको भन्ने आफूहरूको बुझाइ रहेको पनि बताए।
‘चैत १५ गते सबै सुरक्षा निकायहरूले राम्रो काम गरेको भन्ने हाम्रो बुझाइ छ, केही तलमाथि भए आन्तरिक रूपमा छलफल र सुधार गर्दै लैजान्छौं,’ उनले भने, ‘असामान्य परिस्थिति र संविधानविपरीत गतिविधिमा प्रहरीले बल प्रयोग गर्छ।’
चार हजार जनाको भिडलाई प्रहरीले नियन्त्रणमा राख्न नसकेको भन्दै आलोचना हुने गरेको प्रसंगमा उनले भने, ‘चार हजार भिडलाई नियन्त्रणमा लिनेबारे पनि कुरा उठेको छ। १०० जनाको दरले समूह रहने र त्यसमा ४० जना आतंककारीजस्तो लाग्ने समूह भएपछि पूर्वतयारीले काम गर्दैन।’
तीनकुने क्षेत्रमा त्यस प्रकृतिको घटना होला भन्ने आकलन नगरिएको उल्लेख गर्दै उनले सभापछि प्रदर्शन निस्केला भन्ने आकलन गरिएको बताए। तर सभास्थतर्फ भिड नगई प्रहरी घेरा तोड्न खोजेको उनको भनाइ थियो।
उनले भिड नियन्त्रणमा लिन आवश्यकताका आधारमा पानीका फोहरा, अश्रुग्यास र हवाई फायर पनि गरिएको बताए।
‘कम क्षतिमा काम गर्न प्रयास गरेको हो, हाम्रो ग्यास गन लुटिएको छ, सञ्चार सेट लुटेकोमा पछि प्राप्त भयो भने दमकल तोडफोड भएको छ, अराजक र आतंककारी गतिविधि भयो,’ उनले भने।
प्रहरीले संयमता अपनाउँदै तीन-घन्टामा स्थिति नियन्त्रणमा लिएको उनले बताए। प्रहरी संगठनलाई स्रोत र साधन आवश्यक रहेको पनि उनले बताए।
कम बल प्रयोग गर्दा र बढी बल प्रयोग गर्दा पनि यस्ता घटनामा प्रश्न उठ्ने गरेको उनको भनाइ थियो।
-1743756720.jpeg)
