गृहमन्त्री रमेश लेखकले तीनकुने घटनाको निष्पक्ष छानबिन हुने बताएका छन्।
प्रतिनिधि सभाको राज्य व्यवस्था तथा सुशासन समितिको शुक्रबारको बैठकमा बोल्दै गृहमन्त्री लेखकले चैत १५ गते काठमाडौंको तीनकुने क्षेत्रमा भएका घटनाको निष्पक्ष छानबिन हुने बताएका हुन्।
‘तीनकुने घटनाको निष्पक्ष रूपमा अनुसन्धान र छानबिन हुन्छ,’ गृहमन्त्री लेखकले भने।
बैठकमा नेकपा (माओवादी केन्द्र) का प्रमुख सचेतक हितराज पाण्डेले तीनकुने घटनाबारे छानबिन गर्न आयोग गठन गर्न माग गरेका थिए।
दुर्गा प्रसाईंको आह्वानमा राजसंस्था पुनर्स्थापनाका लागि भन्दै चैत १५ गते तीनकुनेमा प्रदर्शन र सभा थियो। प्रदर्शनकारीले सुरक्षा घेरा तोड्न खोजेका थिए भने प्रसाईंले गाडीले प्रहरीलाई पेल्दै सुरक्षा घेरा तोडेका थिए।
प्रहरीले पानीका फोहरा, अश्रुग्यास र गोली चलाएको थियो। प्रदर्शनकारीहरूले निजी घर र सरकारी सवारी साधन तोडफोड र आगजनी गरेका थिए।
तीनकुने घटनामा दुई जनाको मृत्यु भएको थियो। केही घाइतेहरूको अस्पतालहरूमा उपचार जारी छ।
यो पनि: तीनकुनेमा सुरक्षाकर्मीले संयमता नअपनाएको भए थप क्षति हुन्थ्यो: गृहमन्त्री
