ठ्याक्कै तीन महिना १४ दिनपछि आज कार्यालय पुगेका काठमाडौं महानगरपालिकाका प्रमुख प्रशासकीय अधिकृत सरोज गुरागाईंलाई कर्मचारीहरूले उनको कार्यकक्षको ताला फोडेर प्रवेश गराएका छन्।
उपप्रमुख सुनिता डंगोल, कार्यपालिका सदसस्य सहितको अनौपचारिक बैठकपछि उनीहरूले ताला फोडेर गुरागाईंलाई कार्यकक्षमा प्रवेश गराएका हुन्।
अनौपचारिक बैठकमा नगर प्रहरी प्रमुख राजु पाण्डेलाई उपप्रमुख डंगोलले 'तपाईंले लिखित आदेशमा ताला लगाउनु भएको हो कि मौखिक आदेशमा?' भनेर प्रश्न गर्दा पाण्डेले 'मौखिक आदेशमा लगाएको' प्रतिक्रिया दिएका थिए।
पाण्डेले त्यस्तो प्रतिक्रिया दिएपछि कर्मचारीहरू थप आक्रोशित बनेका थिए। त्यसपछि कर्मचारीहरूले गुरागाईंलाई लिएर कार्यकक्षमा प्रवेश गराएका थिए। त्यसपछि उनले हाजिर गरेका हुन्।
त्यसअघि गुरागाईंसहितको बैठकमा उपप्रमुख डंगोलले मेयर साहलाई कोठामा बसेर निर्देशन दिने होइन कार्यालयमा आएर समस्या समाधानका लागि पहल गर्न सुझाव दिएकी थिइन्।
संघीय मामिला तथा सामान्य प्रशासन मन्त्रालयले गुरागाईंलाई काठमाडौं महानगरपालिकामै हाजिर गर्ने वातावरण बनाइदिनु भन्दै आजभन्दा ठिक एक महिनाअघि पत्र पठाएको थियो।
पत्र पठाएको ठ्याक्कै एक महिनापछि आज गुरागाईं महानगरपालिका पुगेका हुन्।
उपप्रमुख सुनिता डंगोल, अधिकांश कार्यपालिका सदस्य, वडाध्यक्षहरू र कर्मचारी पनि उनी कार्यालय पुग्दा सँगै रहेका थिए।
मेयर बालेन साहले उनलाई अवरोध गर्न नगर प्रहरी परिचालन गरे पनि नगर प्रहरीको अवरोध छिचोल्दै गुरागाईं कार्यालय प्रवेश गरेका थिए।
कार्यालय प्रवेश गरेपछि पनि उनी कार्यकक्षमा प्रवेश गर्न खोज्दा मेयर बालेन साहले कार्यकक्षमै चाबी लगाएर बेपत्ता भएका थिए। गुरागाईंलाई कार्यकक्षमा प्रवेश गर्न रोक लगाएपछि बोर्ड बैठक हलमा उपप्रमुख सुनिता डंगोल, वडाध्यक्षहरू बैठक बसेका थिए।
मेयर बालेन साहले लामो समयदेखि व्यक्तिगत ‘इगो’ का कारण प्रमुख प्रशासकीय अघिकृतलाई कार्यालय प्रवेशमा रोक लगाएर कर्मचारीहरूको नियमित तलब समेत रोक्का गरिदिएको भन्दै कर्मचारीहरू पनि असन्तुष्ट बनेका थिए।
गुरागाईं कार्यालय पुग्दा सबैले मेयरका विरूद्ध नाराबाजी गर्दै अघि बढाएका थिए। त्यहाँ कर्मचारी र वडाध्यक्षहरूले समेत मेयर साहले समस्या समाधानमा भन्दा पनि स्टन्टमा बढी ध्यान दिँदा समस्या भएको भन्दै विरोध गरेका थिए।
यो पनि पढ्नुहोस्-
