काठमाडौं महानगरपालिकाको कार्यालयमा नगर प्रहरी परिचालन गरिएको छ।
बिहीबार प्रमुख प्रशासकीय अधिकृत सरोज गुरागाईं काममा फर्कने तयारी गरेपछि रोक्नका लागि नगर प्रहरी परिचालन गरेको आरोप छ।
तर महानगरका प्रवक्ता नवीन मानन्धरले सुरक्षाका लागि नगर प्रहरी परिचालन गरिएको बताए।
‘सुरक्षाका लागि नगर प्रहरी परिचालन गरिएको हो, प्रमुख प्रशासकीय अधिकृत आउनु भएको छैन, उहाँ आइपुग्नु नै नभएकोले रोक्नलाई प्रहरी राखेको भन्न मिल्दैन,’ उनले भने।
महानगरका कर्मचारीहरूले भने प्रमुख प्रशासकीय अधिकृतलाई काम गर्न दिनुपर्ने बताइरहेका छन्। नेपाल सरकारले खटाएको प्रमुख प्रशासकीय अधिकृतलाई सहजै प्रवेश गर्न दिनुपर्ने पनि कर्मचारीहरूको माग छ।
कर्मचारीहरूले केहीबेरमा प्रमुख प्रशासकीय अधिकृत महानगर कार्यालय आइपुग्ने पनि बताएका छन्।
काठमाडौं टावर निर्माण गर्ने नक्सा पासको विवाद बढ्दै गएपछि प्रमुख प्रशासकीय अधिकृत गुरागाईंलाई काठमाडौं महानगरपालिकाले कार्यालय छिर्न रोक लगाएको थियो।
मेयर बालेन शाहले संघीय सरकारलाई नयाँ प्रमुख प्रशासकीय अधिकृत पठाइदिन आग्रह गर्दै आएका थिए भने संघीय मामिला तथा सामान्य प्रशासन मन्त्रालयले गुरागाईंलाई नै काममा लगाउन आग्रह गर्दै आएको थियो।
यो पनि: पहिले बालेनले दिएका थिए स्वीकृति, यसपालि प्रमुख प्रशासकीय अधिकृत गुरागाईंले गरे नक्सा पास
