राष्ट्रिय प्रजातन्त्र पार्टी (राप्रपा) का वरिष्ठ उपाध्यक्षसमेत रहेका प्रतिनिधि सभा सांसद बुद्धिमान तामाङले चैत १५ गते तीनकुनेको मञ्चमा पूर्वराजा ज्ञानेन्द्र शाह र दुर्गा प्रसाईंको बराबरको फोटो देखेपछि आफू फर्किएको बताएका छन्।
राजसंस्था पुनर्स्थापनाका लागि चैत १५ गते शुक्रबार प्रसाईंको आह्वानमा तीनकुनेमा प्रदर्शन र सभा आयोजना भएको थियो तर कार्यक्रम शान्तिपूर्ण हुन सकेन, तोडफोड र आगजनी भयो।
नवराज सुवेदी नेतृत्वको 'राजसंस्था पुनर्स्थापना संयुक्त जनआन्दोलन समिति' ले तोकेका 'जनकमाण्डर' मेडिकल व्यवसायी प्रसाईंको आह्वानमा उक्त प्रदर्शन भएको थियो। यो प्रदर्शनलाई राप्रपाले पनि समर्थन जनाएको थियो।
कार्यक्रममा सहभागी हुन आफू पनि पुगेको तर केहीबेरमै फर्केको राप्रपा सांसद तामाङले बताए।
प्रतिनिधि सभाको राज्य व्यवस्था एवं सुशासन समितिको बुधबारको बैठकमा सांसद तामाङले मञ्चमा राखिएको राजा र दुर्गा प्रसाईंको फोटो देखेरै फर्किएको बताएका हुन्।
‘म गएँ, सरर हेरेँ। मञ्चमा राजाको फोटो, उही बराबरको दुर्गा प्रसाईंको फोटो। यो त खत्तम रहेछ भनेर फरक्क फर्कें’, सांसद तामाङले भने, ‘सिनामंगलसम्म आउँदा त अश्रुग्यास पड्कियो, सुरू हुन नपाइ मञ्चमै हान्दियो।’
तामाङले अब राजावादीको जथाभावी कार्यक्रममा राप्रपा सहभागी नहुने बताए।
‘कसको कार्यक्रम क्लियर हुनुपर्यो, जथाभावी कार्यक्रम गर्ने हो भने हामी सहभागी हुन्नौं भनेर बैठकबाट निर्णय पास गर्यौं’, उनले भने, ‘तर त्यो घटनाको तुरुन्त न्यायिक जाँच होस्। राष्ट्रिय र अन्तर्राष्ट्रिय मानव अधिकारवादीबाट जाँच होस्।’
उनले आफ्नो पार्टीका वरिष्ठ उपाध्यक्ष रवीन्द्र मिश्र र महामन्त्री धवल शम्शेर राणा पनि थुनामा रहेकोले सत्य बाहिर आउनुपर्ने बताए।
‘सत्यतथ्य आउनुपर्छ। वरिष्ठ उपाध्यक्ष र महामन्त्री थुनामा हुनुहुन्छ। नेपालको भएभरको कानुन सबै लगाएको छ’, तामाङले भने, ‘जाँच हुनुपर्छ, एक ढंगले पेल्ने काम भएको छ। सरकारले अहिलेसम्म न्यायिक जाँच आयोग किन गठन गरेन? मानव अधिकार आयोगलाई किन लगाउँदैन। प्रवेश दिनुपर्यो नि, त्यसपछि जसको गल्ती छ, उसलाई नेपालको जे जे कानुन छ लगाऔं।’
तीनकुने घटनामा प्रसाईं फरार छन्।
तीनकुने घटनामा दुई जनाको मृत्यु भएको थियो भने केही मानिस घाइते छन्। निजी घर र सरकारी सवारी साधनमा आगजनी तथा भाटभटेनी सुपर मार्केटमा लुटपाट पनि भएको थियो।
