नेकपा एमालेका पोलिटब्युरो सदस्य देवीप्रसाद ज्ञवालीले काठमाडौंको तीनकुनेमा राजावादीले गरेको हर्कतले देशमा राजा आए के हुन्छ भन्ने कुरा प्रष्ट पारेको बताएका छन्।
सोमबार सुदृढ गणतन्त्र र संविधानको रक्षाका लागि पार्टीले भरतपुरमा गरेको जिल्लामा जागरण सभामा बोल्दै उनले राजतन्त्रको चरित्रमै अराजगता देखिएको बताए।
‘उनीहरू व्यक्तिको निजी सम्पत्तिमा आगजनी गर्दा रहेछन्, पत्रकारलाई जलाउँदा रहेछन्, सञ्चार संस्थामा तोडफोड गर्दा रहेछन्, राजनीतिक दलका कार्यालयमा आगजनी र तोडफोड गर्दा रहेछन्,’ ज्ञवालीले भने, ‘राजतन्त्रको चरित्र के हो भनेर उनीहरूले देखाइसकेका छन्।’
पार्टीका चितवन जिल्ला इन्चार्जसमेत रहेका ज्ञवालीले देशमा राजतन्त्र हुँदा ५४ प्रतिशत नागरिक गरिबीको रेखामुनि रहेकोमा अहिले गरिबी १५ प्रतिशतमा झरेको बताए।
‘गणतन्त्र आएपछि यस्ता थुप्रै सकरात्मक परिवर्तन भएका छन्। त्यसैले व्यवस्थाप्रति निराश हुन पर्दैन,’ उनले भने, ‘समृद्ध नेपाल र सुखी नेपाली बनाउने अभियानमा सबैले साथ दिनुपर्छ।’
नेकपा एमालेका केन्द्रीय सदस्य एवं बागमती प्रदेश सभाका संसदीय दलका नेता जेएन थपलियाले नेपाली जनताहरूले अब निरंकुशता नचाहने बताए।
उनले नेकपा एमालेको नेतृत्वमा देशमा विकासको लहर आउन खोज्दा त्यसलाई रोक्न असन्तुष्टी पैदा गराउने तत्वहरू सक्रिय भएको बताए।
नेकपा एमाले चितवनका अध्यक्ष कमलराज पाठकले जनताको ठूलो बलिदानीपूर्ण आन्दोलनबाट आएको व्यवस्था सहजै फर्काउने सपना नदेख्न चेतावनी समेत दिए।
भरतपुरको गेष्ट हाउस चौरबाट सुरू भएको र्याली अस्पताल रोड हुँदै चौबीसकोठीमा पुगेपछि जागरण सभा गरिएको थियो।
