अमेरिकी राष्ट्रपति डोनाल्ड ट्रम्पले राष्ट्रपतिको रूपमा तेस्रो कार्यकालका लागि आफू गम्भीर रहेको बताएका छन्।
एनबिसी टेलिभिजनको मिट द प्रेस कार्यक्रममा ट्रम्पले आफूले भन्दै आएको तेस्रो कार्यकालको विषय ठट्टा नभएको बताएका हुन्।
'म यो कुरामा ठट्टा गरिरहेको छैन,' आइतबारको टेलिभिजन अन्तर्वार्तामा उनले भनेका छन्।
ट्रम्पले धेरै अमेरिकीहरूमा आफूलाई तेस्रो कार्यकालका लागि पनि राष्ट्रपति बनिदेओस् भन्ने धारणा रहेको बताए।
यद्यपि अहिले दोस्रो कार्यकालकै काममा व्यस्त रहेको ट्रम्पले बताए।
अमेरिकाको संविधानले एक जना व्यक्ति दुई कार्यकाल मात्रै राष्ट्रपति बन्न पाउँछ। सो अनुसार ट्रम्पको यो अन्तिम कार्यकाल हो।
टेलिभिजनकी होस्ट क्रिस्टेन वेल्करले संविधानको सोही प्राबधानबारे ट्रम्पलाई सोधेकी थिइन्।
जबाफमा ट्रम्पले त्यसमा बाटोहरू थुप्रै रहेको बताएको अमेरिकी अखबार न्युयोर्क टाइम्सले जनाएको छ। त्यसो भनेर ट्रम्पले संविधान संशोधन गर्न सकिनेबारे इंगित गरेका हुन्।
यद्यपि अमेरिकी संसदको वर्तमान जोडघटाउले संविधान संशोधन सजिलै सम्भव नभएको र अरू बाटोहरू रहेकोबारे पनि ट्रम्पले बताए। त्यो भनेको अर्को कार्यकाल उपराष्ट्रपति जेडी भान्सले जितेर ट्रम्पलाई फेरि सत्ता दिन सक्छन् भन्ने कुरा राखे।
टेलिभिजन अन्तर्वार्तापछि ह्वाइट हाउसले राष्ट्रपति ट्रम्प वर्तमान कार्यकालमै ध्यानमग्न रहेको बताएको छ।
ह्वाइट हाउस सञ्चार निर्देशक स्टेभन चेङले अमेरिकी जनताले ट्रम्पको ' अमेरिका पहिले (अमेरिका फर्स्ट)' नारा रूचाएको बताए। उनले अहिले बाइडेनले बिगारको कुरा ठीक गरी अमेरकालाई उत्कृष्ट बनाउन लागिपरेको बताए।
ट्रम्पले सुरूवातमा ठट्टयौली शैलीमा आफू तेस्रो कार्यकालका लागि पनि राष्ट्रपति बन्ने बताउँदै आएको भएपनि अहिले त्यो कुरा ट्रप्पले साँच्चै सोचेको जस्तो देखिने न्युयोर्क टाइम्सले लेखेको छ।
ट्रम्प राष्ट्रपति भएको तीन दिनमै टेनेसीका सांसद एन्डी ओगल्सले दुई कार्यकाल मात्रै राष्ट्रपति बन्न पाउने प्राबधानलाई संशोधन गर्ने प्रस्ताव ल्याएका थिए। तर संशोधनका लागि धेरै सांसदहरूको समर्थन चाहिने भएकाले सजिलो नरहेको बताइएको छ।
