शिक्षा, विज्ञान तथा प्रविधिमन्त्री विद्या भट्टराईले त्रिभुवन विश्वविद्यालयका उपकुलपति प्राध्यापक डा. केशरजंग बरालले किन राजीनामा दिनुभएको भन्ने बारेमा आफूलाई जानकारी नरहेको बताएकी छन्।
आइतबार सिंहदरबारमा बसेको शिक्षा, स्वास्थ्य तथा सूचना प्रविधि समितिको बैठकमा सांसदहरूले उठाएका प्रश्नको जबाफ दिने क्रममा उनले यस विषयमा आफू अनविज्ञ रहेको बताएकी हुन्।
आफूले पनि सञ्चार माध्यमबाट नै राजीनामाको जानकारी पाएको बताइन्।
उनले शनिबार बिदा परेकाले आफूसमक्ष सो जानकारी नआएको र आजसम्म आउने विश्वास व्यक्त गरिन्। किन राजीनामा दिनुभएको हो भन्नेबारेमा औपचारिक जानकारी नरहेकाले औपचारिक तवरबाट जानकारी पाएपछि मात्रै समितिलाई जानकारी गराउने प्रतिबद्धता जनाइन्।
मन्त्री भट्टराईले भनिन्, ‘हिजो बिदाको दिन भयो। त्यसकारण आजसम्ममा थाहा हुन्छ। त्यसपछि हामी जानकारी गराउनेछौँ। समितिलाई जानकारी गराउनेछौँ। जसरी यहाँहरूले मिडियामार्फत् थाहा पाउनुभयो, मेरो पनि स्रोत त्यही नै हो। किनभने उपकुलपतिले बुझाउनका लागि शिक्षा मन्त्रालय आउन बिदा भयो हिजो। त्यसकारण आज दिउँसोसम्म थाहा होला। मैले अनौपचारिक जानकारी लिने एउटा पक्ष रह्यो। तर मैले विश्वविद्यालयमै जानकारी लिने कुरा रहन्छ। सहकुलपतिले निर्देशन दिन सक्ने भन्ने मात्रै हो। अरू कुराको सबै जानकारी लिने मात्रै हो। जानकारी अनौपचारिक हिसाबले लिन पाइयो। तर औपचारिक हिसाबले कुनै पनि जानकारी हामीसमक्ष नआइपुगेको हुँदा यो बैठकमा जानकारी गराउन सक्दिनँ। अर्को बैठकमा सबैकुरा बुझेर आइसकेपछि यहाँहरूलाई पुनः जानकारी गरोन प्रतिबद्धता जनाउँछु।’
उपकुलपति प्रा.डा. बरालले शनिबार विश्वविद्यालयको उपकुलपतिबाट राजीनामा दिएका थिए। उनले बिरामीको कारण देखाउँदै राजीनामा दिएका हुन्।- न्युज एजेन्सी नेपाल
