प्रमुख प्रतिपक्षी दल नेकपा (माओवादी केन्द्र)सहित विपक्षी दलहरूले संसद अवरोध जारी राख्ने भएका छन्।
आइतबार सभामुख देवराज घिमिरेले प्रमुख सचेतकहरूसँग गरेको छलफलमा प्रतिपक्षी दलहरूले संसद अवरोध कायम राख्ने अडान लिएको सभामुख घिमिरेका प्रेस सल्लाहकार शेखर अधिकारीले जानकारी दिए।
छलफलमा नेपाली कांग्रेसका प्रमुख सचेतक श्याम घिमिरे, नेकपा (एमाले)का महेश बर्तौला, प्रमुख प्रतिपक्षी नेकपा (माओवादी केन्द्र)का प्रमुख सचेतक हितराज पाण्डे, राष्ट्रिय स्वतन्त्र पार्टीका सन्तोष परियार र राप्रपाका ज्ञानेन्द्र शाही सहभागी थिए।
छलफलमा सभामुख घिमिरेले तीनकुने घटना लोकतन्त्रमाथिको प्रहार भएकाले संसदमा छलफल र बहस गर्ने वातावरण बनाउन दलहरूलाई आग्रह गरेका थिए।
एमालेका मुख्य सचेतक बर्तौलाले प्रधानमन्त्री ओलीले सोमबार प्रतिनिधि सभामा सम्बोधन गर्ने जानकारी गराएका थिए। त्यसकारण तत्कालका लागि अवरोध स्थगित गर्न विपक्षी दलहरूलाई आग्रह गरेका थिए।
यद्यपि प्रतिपक्षी दलहरूले संसद अवरोध कायम राख्ने अडान लिएको अधिकारीले जानकारी दिए।
सरकारले कुलमान घिसिङलाई विद्युत प्राधिकरणको कार्यकारी निर्देशकबाट हटाउने निर्णय गरेको विषयमा प्रधानमन्त्रीको जबाफ माग गर्दै प्रतिपक्षी दलहरूले संसदमा अवरोध गर्दै आएका छन्।
आइतबार ११ बजेदेखि सुरू हुने भनिएको बैठकमा पनि अवरोध कायम हुने देखिएपछि सभामुख घिमिरेले प्रमुख सचेतकहरूसँग छलफल गरेका थिए।
