राष्ट्रिय प्रजातन्त्र पार्टी (राप्रपा) ले शुक्रबार दुई जनाको ज्यान जाने गरी राजधानीमा भएको हिंसात्मक प्रदर्शनको दोष सरकार नै भएको बताएको छ।
राप्रपा केन्द्रीय कार्यसम्पादन समितिको शनिबार सम्पन्न बैठकले शुक्रबारको हिसांत्मक घटना सरकारकै कारण भएको ठहर गरेको छ। बैठकपछि सञ्चारकर्मीसँग कुरा गर्दै अध्यक्ष राजेन्द्र लिङ्देनले सरकारी दमनले हिंसा निम्त्याएको दाबी गरेका हुन्।
राजावादीहरूले घोषणा गरेका ‘जनकमाण्डर’ दुर्गा प्रसाईं, राप्रपा वरिष्ठ उपाध्यक्ष रविन्द्र मिश्र, महामन्त्री धवल शमशेर जबरा लगायतको उक्साहटमा शुक्रबारको राजावादी प्रदर्शन वितण्डामा परिणत भएको थियो।
राजावादीहरूले सर्वसाधारणका घरघरमा आगो लगाउने, औषधि कम्पनीदेखि सवारी साधनमा आगजनी गरेका थिए। उक्त घटनामा एक जना पत्रकारको जलेर मृत्यु भयो भने प्रहरीको गोली लागेर सविन महर्जनको ज्यान गएको थियो।
बैठकले मुख्यतः तीन वटा निर्णय गरेको छ।
अध्यक्ष लिङ्देनले बैठकपछि दिएको जानकारी अनुसार राप्रपाले शुक्रबार ज्यान गुमाएका दुई जनालाई सहिद घोषणा गर्न र उनका परिवारलाई क्षतिपूर्ति रकम उपलब्ध गराउन माग गरेको छ।
शुक्रबारको घटनाको निष्पक्ष छानबिनका लागि जाँचबुझ समिति बनाउन पनि राप्रपाको माग छ।
उसको अर्को माग आफ्ना दुई नेताहरू रविन्द्र मिश्र र धवलशमशेरलाई २४ घन्टाभित्र रिहा गर्नुपर्ने भन्नेछ।
