नेकपा (माओवादी केन्द्र) का उपमहासचिव जनार्दन शर्माले सबै दलहरुले आफूलाई सुधार गर्दै परिवर्तनका बाँकी काम पूरा गर्ने जिम्मेवारी लिनुपर्ने बताएका छन्।
शनिबार प्रेस सेन्टरको महाधिवेशनलाई सम्बोधन गर्दै शर्माले जनताले राजनीतिक दलहरूबाट सुधार मागिरहेको र सुधार गर्ने प्रतिबद्धता जनाउनुपर्ने बताएका हुन्।
'सबै दलहरुले आफूलाई सुधार्दै, सच्याउँदै परिवर्तनको बाँकी काम पूरा गर्ने जिम्मेवारी लिनुपर्छ । निरन्तर सुधारको बाटोबाट मात्रै यो सम्भव छ । जनताले आज हामीबाट सुधार मागिरहेका छन् । सुधार खोजिरहेका छन् । हरेक क्षेत्रमा सुधार गर्ने प्रतिवद्धता र आफ्ना कमजोरीको आत्मलोचना गर्दै जनताको भावनालाई सम्बोधन गर्नुपर्ने आवश्यकता छ,' उनले भने।
अहिले भइरहेका आन्दोलनमा पनि गणतन्त्रविरोधी छन् भन्ने नलाग्ने उनले बताए।
'आज हाम्रा बिरुद्ध वा परिवर्तनका बिरुद्ध, गणतन्त्रकाबिरुद्ध जस्तो देखिए पनि यी गणतन्त्रका बिरोधी छन् जस्तो मलाई लाग्दैन । सिमित सामन्तवादका केही अवशेषहरु मात्रै हुन्,' उनले भने।
यद्यपि संघीय लोकतन्त्र बिथोल्न हिंसा र अराजकता फैल्याउने काम भइरहेको र त्यसप्रति गम्भीर हुनुपर्ने उनले बताए। - न्युज एजेन्सी नेपाल
