काठमाडौंको तीनकुनेमा भएको राजावादीहरूको हिंसात्मक प्रदर्शनमा संलग्न ५१ जनालाई प्रहरीले नियन्त्रणमा लिएको छ।
अमानवीय, अमर्यादित तथा गैरकानुनी आपराधिक गतिविधिमा संलग्न भएको भन्दै प्रहरीले ५१ जनालाई नियन्त्रणमा लिई अनुसन्धान गरिरहेको जिल्ला प्रहरी परिसर काठमाडौंले जनाएको छ।
त्यस्तै, प्रदर्शन क्रममा निजी सम्पत्ति, अस्पताल, सञ्चार गृह, राजनीतिक दलका कार्यालय, व्यापारिक केन्द्र लगायत यातायत साधनहरूमाथि तोडफोड, आगजनी लगायतका आपराधिक घटना भएको प्रहरीले जनाएको छ।
प्रहरीका अनुसार प्रदर्शनकारीहरूको आक्रमणमा परेर ५३ जना प्रहरी घाइते भएका छन् भने सशस्त्र प्रहरीबाट २२ जना घाइते छन्। त्यस्तै, ३५ जना प्रदर्शनकारी घाइते भएको प्रहरीले जनाएको छ।
प्रदर्शन क्रममा कीर्तिपुर नगरपालिका- ४ का २९ वर्षीय सविन महर्जन र पत्रकार सुरेश रजकको मृत्यु भएको पनि प्रहरीले जनाएको छ।
प्रहरीले सरकारी र निजी गरी १५ वटा सवारी साधनमा क्षति पुगेको बताएको छ।
तीनकुने अन्नपूर्ण कम्प्लेक्स, मार्बल हाउस, कोटेश्वर महादेवस्थान, विमानस्थल कार्गोको कम्पाउन्डभित्र, कोटेश्वर गणेश चोक, भाटभटेनी नजिक सरकारी गाडीमा र जडिबुटी उत्पादन तथा प्रशोधन केन्द्रमा आगलागी भएको प्रहरीले बताएको छ।
त्यस्तै, एकीकृत समाजवादी पार्टी कार्यालय, बालकुमारीबाट काठमाडौंतर्फ आउने करिडोर बाटो, बानेश्वर पुल पारिपट्टि, एयरपोर्टनिर, इन्द्रेणी सहकारीको कार्यालय रहेको भवन, सिनामंगल, रोयल रेस्टुरेन्ट, एरोम्याक्सको कार्यालय रहेको भवन लगायत १४ स्थानमा आगलागी भएको छ।
अन्नपूर्ण मिडिया हाउस, कान्तिपुर मिडिया हाउस, केएमसी अस्पताल, सिनामंगलस्थित डिआइए अगाडि बन्दै रहेको नयाँ भवन, प्रहरी बिट सिनामंगल, भत्केको पुल, प्रहरी प्रभाग कोटेश्वर, ट्राफिक प्रहरी प्रभाग कोटेश्वर र समाजवादी पार्टी कार्यालय, बागमती करिडोरमा क्षति भएको जनाइएको छ।
कोटेश्वरस्थित भाटभटेनी सुपर मार्केटमा चोरी तथा लुटपाट भएको पनि प्रहरीले जानकारी दिएको छ।
-1743165945.jpg)
