राष्ट्रिय स्वतन्त्र पार्टी (रास्वपा) ले शुक्रबार राजावादीहरूबाट भएको अक्षम्य गतिविधिहरूको भर्त्सना गरेको छ।
शुक्रबार राति पार्टीका कार्यवाहक प्रवक्ता मनीष झाले एक विज्ञप्ति जारी गर्दै पूर्वराजा पक्षधरहरूबाट भएको अराजकता, मानवीय क्षति, निजी तथासार्वजनिक सम्पत्तिमाथिको हमला, लुटपाट तथा आगजनी जस्ता घटनाको भर्त्सना गरेको हो।
घटना भड्काउने र जनधनको क्षति गराउनेहरूलाई हदैसम्मको कारबाहीको माग पनि रास्वपाले गरेको छ।
'आगामी दिनमा आन्दोलनरत पक्षलाई जिम्मेवार एवं शान्तिपूर्ण रूपमा प्रस्तुत हुन सचेत गराउँछौं,' रास्वपा कार्यवाहक प्रवक्ताले शुक्रबार राति एक विज्ञप्ति जारी गर्दै भनेका छन्।
रास्वपाले पत्रकार सुरेश रजक र सविन महर्जनको मृत्युप्रति दुःख व्यक्त गर्दै शोक सन्तप्त परिवारजनमा समवेदना व्यक्त गरेको छ।
त्यस्तै भक्तपुरतर्फ गइरहेका रास्वपाका प्रमुख सचेतक सन्तोष परियार चढेको सरकारी गाडी बालकुमारीमा जलाइदिएको घटनाको पनि निन्दा गरेको छ।
हेर्नुस् रास्वपाको विज्ञप्ति
शान्तिपूर्ण आन्दोलन संविधानले दिएको अधिकार मात्र होइन, लोकतन्त्रमा नागरिक सहभागिताको स्वीकृत विधि पनि हो। लोकतन्त्रमा लोकतन्त्रकै विरोध गर्न पाउनु सबैभन्दा उदार र सुन्दर विशेषता रहेता पनि यस्तो आधारभूत मान्यताबाट पर गई आज पूर्वराजा पक्षधरहरूबाट भएको अराजकता, मानवीय क्षति, निजी तथा सार्वजनिक सम्पत्तिमाथिको हमला, लुटपाट तथा आगजनी जस्ता अक्षम्य गतिविधिहरुको राष्ट्रिय स्वतन्त्र पार्टी घोर भर्त्सना गर्दछ।
आजको घटना भड्काउने र जनधनको क्षति गराउनेहरूलाई हदैसम्मको कारबाहीको माग गर्दै आगामी दिनमा आन्दोलनरत पक्षलाई जिम्मेवार एवं शान्तिपूर्ण रूपमा प्रस्तुत हुन सचेत गराउँछौं।
आजको आन्दोलन अराजक हुन सक्ने पूर्व सूचनाहरूका बाबजुद सरकार र गृह प्रशासन कत्ति पनि चिन्तित र तयार नरहेको घटनाक्रमहरूले देखाउँछ। आमजनताको सम्पत्तिको सुरक्षा गर्नु, संयमता अपनाई हिंसात्मक हुन सक्ने भीडलाई नियन्त्रण गर्नु सरकारको दायित्व हो। विषम परिस्थितिमा सरकारको असंवेदनशील अक्षमताको पूर्ण जिम्मेवारी गृह मन्त्रीले नै लिनपर्छ भन्ने हाम्रो ठहर हो।
आज भएको प्रदर्शनको भिडिओ खिचिरहेका एभिन्युज टेलिभिजनका पत्रकार सुरेश रजक र कीर्तिपुरका २९ वर्षीय सविन महर्जनको मृत्यु भएकोप्रति गहिरो दुःख व्यक्त गर्दै शोक सन्तप्त परिवारजनमा हार्दिक समवेदना व्यक्त गर्छौं।
राजावादी समूहले भक्तपुरतर्फ गइरहेका राष्ट्रिय स्वतन्त्र पार्टी (रास्वपा) का प्रमुख सचेतक सन्तोष परियारले प्रयोग गरेको सरकारी गाडी समेत बालकुमारीमा जलाइदिएको घटनाको पनि हामी निन्दा गर्छौं। घाइते हुनुभएका सुरक्षाकर्मी तथा आन्दोलनकारीहरूको शीघ्र स्वास्थ्यलाभको कामना गर्दै स्थानीय प्रशासनद्वारा जारी सूचना अनुसार आ-आफ्नो स्थानमा सुरक्षित र अनुशासित रहन हामी सबैमा अनुरोध गर्छौं।
प्रवक्ता (कार्यवाहक) - मनीष झा
