मेडिकल व्यवसायी दुर्गा प्रसाईंको नेतृत्वमा नवराज सुवेदी संयोजकत्वमा रहेको 'संयुक्त जनआन्दोलन समिति' ले राजसंस्था पुनर्स्थापनाका लागि आन्दोलन गर्ने भएको छ।
बिहीबार काठमाडौंमा पत्रकार सम्मेलन गर्दै संयोजक सुवेदीले प्रसाईं समूहले चैत १५ गते गते प्रदर्शनलाई समितिले समर्थन गर्ने र शुक्रबारदेखि नै आन्दोलन सुरू हुने घोषणा गरे।
सुवेदीले प्रसाईंलाई जनकमान्डर घोषणासमेत गरेका थिए।
प्रसाईंलाई जनकमान्डर घोषणा गर्न आयोजित कार्यक्रममा राप्रपाका नेता प्रकाशचन्द्र लोहनी, उपाध्यक्ष विक्रम पाण्डे र महामन्त्री धवल शम्शेर राणा उपस्थित थिए। लोहनी र राणा मञ्चमा बसेका थिए भने पाण्डे फ्लोरमा बसेका थिए।
महामन्त्री राणा सुवेदी नेतृत्वको समितिमा आन्दोलन परिचालन समितिमा पनि छन्।
राप्रपाले चैत ५ गतेको केन्द्रीय कार्यसम्पादन समिति बैठकबाट अध्यक्ष राजेन्द्र लिङ्देन नेतृत्वमै राजसंस्था पुनर्स्थापना आन्दोलन गर्ने निर्णय गरेको थियो।
चैत १२ गते आन्दोलन परिचालन मूल समिति बैठक गरेर राप्रपाले चैत २६ गते काठमाडौंमा प्रदर्शन गर्ने र वैशाख ७ गतेदेखि काठमाडौंकेन्द्रित आन्दोलन गर्ने घोषणा गरिसकेको छ।
तर राप्रपाका केही पदाधिकारीहरू भने प्रसाईं नेतृत्वको आन्दोलनमा सक्रिय रूपमा सहभागी हुने भएका छन्।
अध्यक्ष लिङ्देननिकट एक पदाधिकारीले सेतोपाटीसँग कुराकानी गर्दै केही नेताहरू प्रसाईंलाई नेता मान्न गएको बताए।
‘पार्टीले आफै आन्दोलन गर्ने भनेको छ, जिम्मेवार नेताहरू व्यक्ति (दुर्गा प्रसाईं) को पछि लाग्नुभएको छ,’ ती पदाधिकारीले भने।
चैत १२ गते बसेको राप्रपा आन्दोलन परिचालन मूल समितिको बैठकमा नेता प्रकाशचन्द्र लोहनीले सुवेदी नेतृत्वको संयुक्त जनआन्दोलन समितिसँग पनि सहकार्य गर्ने विषय समावेश गरिनुपर्ने धारणा राखेका थिए।
तर राप्रपाले 'समान उद्देश्य र विचार भएका राजनीतिक दल, संयुक्त जनआन्दोलन समिति, विभिन्न संघ संगठनहरूसँग सहकार्य, कार्यगत एकता वा मोर्चा गठन गरी आन्दोलनका कार्य अघि बढाइने' निर्णय गरेको थियो।
यो पनि;
राप्रपा नीतिविपरीत नवराज सुवेदीकै नेतृत्वमा आन्दोलन गर्ने धवल शम्शेरको उद्घोष
आन्दोलनको नेतृत्व राजेन्द्र लिङ्देनले आफै लिने, खुम्च्याइयो धवल शम्शेरको भूमिका
रवीन्द्र र धवलले पूर्वराजासँग बढाएको निकटताले राप्रपामा उत्पन्न गरेको तनाव
