सरकारले नेपाल विद्युत प्राधिकरणको कार्यकारी निर्देशकबाट कुलमान घिसिङलाई हटाएकोप्रति विरोध गर्दै राष्ट्रिय स्वतन्त्र पार्टी (रास्वपा) ले मंगलबार विज्ञप्ति निकाल्यो।
विज्ञप्तिको अन्तिममा अनुच्छेदमा भ्रष्टाचारी जोगाउने र बिचौलिया पोस्ने जगमा बनेको सरकारको विरोधमा गरिने शान्तिपूर्ण कार्यक्रमहरूमा पार्टीको नेतृत्व, सहभागिता एवं ऐक्यबद्धता हुने उल्लेख थियो।
बिचौलियाको पृष्ठपोषण गर्न घिसिङ हटाएको भन्दै सरकारविरूद्ध प्रमुख प्रतिपक्षी दल नेकपा (माओवादी केन्द्र) सहित विपक्षी दल आन्दोलनमा छन्।
माओवादी केन्द्र, एकीकृत समाजवादीलगायतको समाजवादी मोर्चाले चैत १५ गते गणतन्त्रको पक्षमा काठमाडौंमा प्रदर्शन गर्दैछ। मोर्चाले यो जनप्रदर्शनलाई भ्रष्टाचार र बेथितिका विरुद्धसमेत जोडेका छन्।
राजसंस्था फर्काउने भन्दै विपक्षी राष्ट्रिय प्रजातन्त्र पार्टी (राप्रपा) पनि प्रदर्शनको तयारीमा छ। उसले चैत २६ गते काठमाडौंमा प्रदर्शनको तयारी गरेको छ।
व्यवस्था उल्ट्याउने भन्दै सरकारविरूद्ध मेडिकल व्यवसायी दुर्गा प्रसाईंसमेत आन्दोलनमा छन्।
राजावादीहरूको प्रदर्शन र आन्दोलनबारे रास्वपाले आधिकारिकरूपमा मुख खोलेको छैन।
पार्टीका कार्यवाहक सभापति डिपी अर्यालले राजावादीहरूको प्रदर्शनबारे रास्वपाले बोल्ने बेला आइनसकेको बताउँदै आएका छन्। पार्टी सभापति रवि लामिछानेले पनि पार्टी नेताहरूलाई राजावादीहरूको प्रदर्शन–आन्दोलनप्रति मौन रहन निर्देशन दिएका छन्।
मंगलबार साँझ रास्वपाले निकालेको विज्ञप्तिको भाषाले ऊ कतै राजसंस्था समर्थहरूका यी आन्दोलनमा पनि सरिक हुने त होइन भन्ने प्रश्न राजनीतिकवृत्तमा उठिरहेकै छ।
प्रतिपक्षी दल नेता, माओवादी केन्द्रका अध्यक्ष पुष्पकमल दाहाल ‘प्रचण्ड’ लाई पनि यस्तो लागेको रहेछ।
उनले विज्ञप्तिको यो भाषाबारे बुधबार बसेको संविधान र गणतन्त्र पक्षधर विपक्षी पार्टीहरूको बैठकमा प्रसंग निकालेका थिए।
बुधबारको विपक्षी दलको बैठकमा रास्वपाबाट कार्यवाहक सभापति डिपी अर्याल (डोलप्रसाद), उपसभापति स्वर्णिम वाग्ले र प्रमुख सचेतक सन्तोष परियार सहभागी थिए। बुधबारको बैठकमा विचार र एजेन्डा नमिल्ने भन्दै राप्रपालाई बोलाइएको थिएन। विपक्षी दलहरूको यसअघिको बैठकमा राप्रपा पनि सामेल हुने गरेको थियो।
अध्यक्ष प्रचण्डले आजको बैठकमा कार्यवाहक सभापति अर्याल र उपसभापति वाग्लेसँग रास्वपाको गणतन्त्रबारेको धारणा मागेका थिए।
जबाफमा कार्यवाहक सभापति वाग्लेले २०८० मंसिर ११, १२, १३ गते महोत्तरीको जलेश्वरमा बसेको बैठकले नै यसबारे प्रष्ट पारिसकेको बताए।
जलेश्वर बैठकले पारित गरेको पार्टीको राजनीतिक प्रस्तावनामा राष्ट्रिय स्वतन्त्र पार्टी (रास्वपा) सबै नेपालीको समतामूलक उन्नतिप्रति कटिबद्ध सामाजिक न्यायसहितको उदार अर्थतन्त्रमा विश्वास गर्ने बहुलवादी लोकतान्त्रिक पार्टी भएको किटान गरेको छ।
‘आजको बैठकमा अध्यक्ष प्रचण्डले विज्ञप्तिको पुछारको अनुच्छेदमा उल्लेख भएको सरकारको विरोधमा गरिने शान्तिपूर्ण कार्यक्रमहरूमा रास्वपाको नेतृत्व, सहभागिता एवं ऐक्यबद्धताप्रति चासो राख्नुभएको थियो। विज्ञप्तिको यस्तो भाषाबाट रास्वपा कतै राजवादीहरूको आन्दोलनमा पनि सहभागी हुने होइन भन्ने प्रश्न बाहिर उठिरहेको प्रचण्डले बताउनुभयो। त्यसमा हाम्रो कार्यवाहक सभापति र उपसभापतिज्यूले प्रष्ट पार्नुभयो,’ प्रमुख सचेतक सन्तोष परियारले भने।
बैठकमा कार्यवाहक सभापति अर्यालले भ्रष्टाचारी जोगाउने र बिचौलिया पोस्ने सरकारको कार्यशैलीविरूद्ध र सुशासनका पक्षमा पार्टी आफै पनि आन्दोलित हुन सक्ने र नागरिक समाज, अन्य पार्टीहरूले गरेको कार्यक्रममा सरिक हुनसक्ने पार्टीको नीति रहेको तर यसको अर्थ राजावादीको आन्दोलनमा पनि सहभागी हुने नरहेको प्रष्ट पारेको परियारले बताए।
उपसभापति वाग्लेले पनि रास्वपा गणतन्त्रप्रति प्रतिबद्ध रहेको र यसमा धेरै छलफल गर्नुपर्ने विषय नै नरहेको बताएका थिए। उनले यसप्रति कसैले शंका गर्नुनपर्ने बताएको प्रमुख सचेतक परियारले जानकारी दिए।
यो पनि:
रास्वपाका कार्यवाहक सभापतिलाई प्रश्न– सरकार विरूद्ध भनेर राजावादीहरूको आन्दोलनमा पनि तपाईंहरूको ऐक्यबद्धता हो?
राजावादीहरूको प्रदर्शनबारे रास्वपाभित्रै प्रश्न, कसले दिने उत्तर?
एजेन्डा र विचार नमिलेपछि विपक्षी दलको बैठकमा राप्रपालाई बोलाइएन: प्रचण्ड
