प्रधानमन्त्री केपी शर्मा ओलीले नेकपा (माओवादी केन्द्र) का अध्यक्ष पुष्पकमल दाहाल 'प्रचण्ड' लाई लक्ष्य गर्दै चिसै पानीले नुहाउनुपर्ला भन्ने टिप्पणी गरेका छन्।
सरकारले नेपाल विद्युत प्राधिकरणका कार्यकारी निर्देशक कुलमान घिसिङलाई गत सोमबारको मन्त्रिपरिषद बैठकबाट हटाउने निर्णय गरेपछि सञ्चारमाध्यमहरूबाट उक्त खबर थाहा पाएको उल्लेख गर्दै प्रचण्डले भनेका थिए, ‘मन्त्रिपरिषद् बैठकबाट कुलमान घिसिङलाई बर्खास्त नै गरेको भन्ने खबर सञ्चारमाध्यमबाट सार्वजनिक भएको छ। आशा गरौं यो खबर असत्य सावित होस्, यदि सत्य रहेछ भने सरकारको यो कदम बिल्कुल गलत र आपत्तिजनक छ। दुई तिहाई बहुमतको दम्भमा गरिएको यो निर्णयप्रति घोर निन्दा गर्दै यसको प्रतिरोध गर्न आग्रह गर्दछु।’
प्रचण्डले फेसबुकमा लेखेको उक्त स्टाटसप्रति लक्ष्य गर्दै प्रधानमन्त्री ओलीले बुधबार भएको युवा संघको भेलामा भने, ‘आफ्ना कुन्ठा छर्ने थलो बनाउन खोज्नु हुन्छ संसदलाई, त्यो हामीले बुझेका छौं। यस्ता खालका क्रियाकलाप नगर्दा हुन्छ। के के न ठूलो अपराध गरेजस्तो, मैले यस्तो थाहा पाएँ, यो कुरा असत्य होस्, कुनै महान् ठूलो कुराजस्तो। भ्रष्टाचार गरेजस्तो। होइन रहेछ भने नत्र, म भन्दिनँ चाहन्छु चिसै पानीले नुहाउनु हुन्छ अन्तिममा।’
घिसिङलाई हटाएको विरोधमा नेकपा (माओवादी केन्द्र) सहित विपक्षी दलहरूले बुधबार प्रतिनिधि सभा र राष्ट्रिय सभामा अवरोध गर्दै प्रधानमन्त्रीबाट जबाफ मागेका थिए।
