काठमाडौंको तारकेश्वर नगरपालिकास्थित नेपालटारमा रहेको ग्रामीण आदर्श बहुमुखी क्याम्पसमा नेपाल विद्यार्थी संघ (नेविसंघ) ले रिले अनशन गरेको छ।
स्वतन्त्र विद्यार्थी युनियन (स्ववियु) निर्वाचन सुनिश्चित गर्न माग गर्दै नेविसंघले बुधबारदेखि रिले अनशन सुरू गरेको हो।
त्रिभुवन विश्वविद्यालयले गत चैत ५ गतेका लागि स्ववियु निर्वाचन तोके पनि यहाँ चुनाव हुन सकेको थिएन।
नेविसंघ क्याम्पस इकाइका अध्यक्ष महेशमणी पौडेलले विभिन्न बाहनामा स्ववियु चुनाव रोक्ने काम भएकोले नेविसंघले रिले अनशन सुरू गरेको बताए।
यहाँ नेविसंघबाट स्ववियु अध्यक्षमा सुल्तान मियाँ छन्। उनी नै अनशनमा बसेका हुन्।
‘कलेजमा हाम्रो संगठनले जित्ने देखिएपछि विभिन्न बहानामा निर्वाचन नगराउने प्रपञ्च रचिएको छ। हामी विद्यार्थीको हक अधिकार सुनिश्चितताका लागि निर्वाचन चाहान्छौं,’ उनले भने।
स्ववियु निर्वाचन सुनिश्चित गर्नका लागि कार्यतालिका सार्वजनिक गर्न उनले माग गरे।
