गजामा हमासविरोधी प्रदर्शन भएको छ।
युद्धको १७ महिनायता पहिलो पटक गजामा हमासविरूद्ध सैयौं प्यालेस्टिनीहरू सडकमा निस्किएर नाराबाजी गरेका हुन्। उनीहरुले हमासलाई गजाको सत्ता छाड्न भनेका छन्।
युद्धविराम यता लाखौं प्यालेस्टिनीहरू गजा फर्किएका थिए। युद्धविराम भाँडिएपछि केही दिन यता इसराइलले गजामा सयौं मानिसहरूको मृत्यु हुनेगरी आक्रमण गरिरहेको छ।
इसराइलले हमासलक्षित कारबाही भनेको छ। मंगलबार गजाको बेत लाहियामा प्लालेस्टिनीहरू सडकमा निस्किएर हमासलाई गजा छोड् भन्दै नाराबाजी गरेका हुन्।
१७ महिनायता गजामा ५० हजारभन्दा बढी मानिसहरू मारिएको अन्तर्राष्ट्रिय सञ्चारमाध्यमहरूले जनाएका छन्।
त्यसको विरोधमा त्यहाँका नागरिकहरूले 'भगवानका लागि गजा छाड्' भन्दै नाराबाजी गरेका हुन्।
नाराबाजी गरेपछि त्यहाँ मास्क र हतियारधारी मानिसहरू आएर भिडलाई लखेट्ने, पिट्ने गरेर तितरबितर पारेको बिबिसीले जनाएको छ। उनीहरू हमासका लडाकू हुनसक्ने बताइएको छ।
सन् २०२३ अक्टोबरपछि इसराइल-हमास लडाईंका कारण गजा अशान्त छ। त्यहाँका हजारौं घरहरू इसराइलको हवाई आक्रमणबाट खण्डहर बनेका छन्।
१७ महिनाको अवधिमा गजामा लाखौं मानिसहरू विस्थापित भएर छिमेकी देश पुगे। अस्पताल, सडक, खानेपानी लगायत अधिकांश पूर्वाधार इसराइली हमलामा तहसनहस भए।
इसराइलले गजामा गरेको आक्रमण मानवता विरूद्ध रहेको भन्दै अन्तर्राष्ट्रिय समुदायले गजामा आक्रमण रोक्न दबाब दिँदा पनि इसराइलले आक्रमण रोकेन बरू बढायो।
यसपालि हमासलाई निमिट्यान्न नबनाई आक्रमण नरोक्ने भनेका थिए।
गत फेब्रुअरीमा गजामा शान्ति स्थापना हुने बाटो खुल्यो। इसराइल र हमासबीच ४२ दिनको युद्धिविराम गराउन कतार, इजिप्ट र अमेरिका लगायतका मध्यस्तकर्ताहरू सफल भए।
४२ दिनलगत्तै दोस्रो चरणको युद्धविराम त्यसपछि तेस्रो चरण हुँदै गजामा स्थायी शान्ति फर्काउन विषयमा सहमति भएको थियो।
त्यसपछि गजा छाडेर भागेका लाखौं मानिसहरू खण्डहर भएपनि आफ्नै घर फर्किएर बस्न थालेका थिए।
तर इसराइल र हमासबीच युद्धविराम भाँडिएपछि इसराइलले गजामा पुनः आक्रमण तेज पारेको छ।
युद्धविरामलाई निरन्तरता दिने सम्झौता गर्न बाध्य बनाउन भनेर इसराइलले हवाइ र जमिनबाट गजामा आक्रमण गरिरहेको छ। युद्धविरामको अवधि समाप्ती यतामात्रै सयौं मानिसहरू मारिइसकेका छन्।
गजामा हमाससँग अझै ५९ जना बन्धक रहेको अन्तर्राष्ट्रिय संचारमाध्यमहरू दाबी गर्छन्। तीमध्ये आधीभन्दा बढी बन्धकहरूको मृत्यु भइसकेको हुनसक्ने पनि आकलन छ।
यस्तो अवस्थामा इसराइलीहरू गजामा आक्रमण भन्दा सम्झौता गरेर बाँकी रहेका बन्धकरूलाई फिर्ता ल्याउनुपर्ने भनेर आन्दोलन गरेका छन्।
हमासका समर्थकहरूले भने प्रदर्शन गर्नेहरुलाई गद्दार भनेको बिबिसीले लेखेको छ। यसबारेमा हमासले आधिकारिक रूपमा कुनै धारणा सार्वजनिक गरेको छैन।
यो पनिः इजरायल-प्यालेस्टाइन द्वन्द्वको नालीबेली
