जनमत पार्टी र नागरिक उन्मुक्ति पार्टी (नाउपा) एकता गर्न बनेको कार्यदलको बैठक सुरू भएको छ।
जनमत र नाउपाले एकीकरणका लागि गठन गरेको कार्यदलको पहिलो बैठक आइतबार साँझ बसेको हो।
बैठकमा जनमतका तर्फबाट अब्दुल खान, शरद सिंह यादव र बाल गोविन्द चौधरी सहभागी छन्।
नाउपाबाट गंगा चौधरी, सुनिता चौधरी र रामलाल डगोरा थारू सहभागी छन्।
पढ्नुस् सम्बन्धित समाचारः
जनमत र नाउपा एकीकरणपछि को बन्छ पार्टी अध्यक्ष?
थरूहट, थरूवान आन्दोलनपछि जन्मिएको नाउपा र पृथकतावादी संघर्ष त्यागेर मूल धारको राजनीतिमा आएको जनमत एकीकरणको अन्तिम चरणमा छन्।
नाउपाले जनमतसँग एकता गर्ने निर्णय केन्द्रीय समितिबाटै गराइसकेको छ।
दुवै पार्टीले तीन–तीन सदस्यीय कार्यदल बनाएर गृहकार्य गरिरहेको भए पनि एकताको आधारभूत कुराहरू टुंगो लागिसकेको नाउपा संरक्षक रेशम चौधरीको दाबी छ।
उनले पार्टीको नाम, चुनाव चिह्न र एकीकृत पार्टीको अध्यक्ष को हुनेसमेत टुंगो लागिसकेको बताएका छन्।
यद्यपि यसको खाका दुवै पार्टीको एकता प्रस्तावमा समेटिने र यसपछि बस्ने केन्द्रीय समितिले अनुमोदन गर्ने नाउपा संरक्षक चौधरीले बताएका छन्।
नाउपाले वैशाख ३ गते कैलालीको टीकापुरमा केन्द्रीय समिति बैठक बोलाएको छ। त्यसअघि नै कार्यदलले एकता प्रस्ताव तयार पार्नेछ। टीकापुरमा बस्ने केन्द्रीय समिति बैठकले कार्यदलको प्रस्ताव पारित गरेसँगै एकता अर्को चरणमा पुग्नेछ।
सम्भवतः वैशाखको पहिलो हप्ताभित्रै नाउपा र जनमतबीच एकता भइसक्ने दाबी पार्टी संरक्षक चौधरीका अतिरिक्त अरू नेताहरूले पनि गरेका छन्।
एक नेताले दिएको जानकारीअनुसार एकीकरणपछि पार्टीको नाम जनमत राख्ने टुंगो लागिसकेको छ। चुनाव चिह्न भने नाउपाको ढकिया रहनेछ।
यद्यपि एकीकरणमा बाबुराम भट्टराई नेतृत्वको नेपाल समाजवादी पार्टी (नयाँ शक्ति) पनि मिसिने सम्भावना बढेको छ।
शुक्रबारदेखि सुरू भएको नाउपको केन्द्रीय समितिको समापन शनिबार भएको थियो। त्यो बैठकमा जनमत अध्यक्ष सिके राउतसँगै नेसपा नयाँ शक्ति उपाध्यक्ष मानुषी यमी भट्टराई पनि पुगेकी थिइन्।
त्यसअघि नेसपा नयाँ शक्ति अध्यक्ष बाबुराम भट्टराई र नाउपा संरक्षक चौधरीबीच एकता वार्ता चलेको थियो।
त्यो छलफलमा जनमत र नाउपा मिल्दा आफू तल बसेर पनि सहयोग गर्न तयार रहेको भट्टराईले बताएको संरक्षक चौधरीको दाबी छ। यद्यपि छलफलका शृंखला बाँकी रहेकाले एकीकरण प्रक्रियामा नेसपा नयाँ शक्ति सामेल हुनेनहुने अनिश्चत नै छ।
जनमत र नाउपा भने एकताको अन्तिम चरणमा रहेको चौधरीको दाबी छ।
जनमतका नेताहरूले एकीकृत पार्टीको अध्यक्ष सिके राउत बन्ने सहमति भइसकेको दाबी गरेका छन्।
नाउपा संरक्षक चौधरी पनि राउतलाई वरीयतामा माथि राख्न तयार छन्। राष्ट्रिय पार्टी र सांसद संख्या पनि बढी भएकाले राउतलाई पहिलो वरीयताका अध्यक्ष दिन कुनै समस्या नरहेको चौधरीको भनाइ छ।
तर नाउपाभित्र सिके र रञ्जिता दुवैलाई अध्यक्ष राखेर जानुपर्ने मत बाक्लिन थालेको छ। त्यसमा सहमति हुन सक्ने रेशम चौधरीले पनि संकेत गरेका छन्।
यसबारे अध्यक्ष रञ्जिता श्रेष्ठले रेशमले एकता वार्ता गरिरहेकाले बताइन्। सिके राउत र रञ्जिता श्रेष्ठलाई अध्यक्ष बनाएर जाने विषयमा चौधरीले बोलेका थिए।
‘उहाँ (नाउपा संरक्षक रेशम चौधरी) ले भनेकै कुरा सत्य हो,’ अध्यक्ष श्रेष्ठले सेतोपाटीसँग भनिन्।
नाउपाका एक नेताले बताएअनुसार एकीकृत पार्टीको संरक्षक रेशम चौधरी, अध्यक्ष सिके राउत र सहअध्यक्ष रञ्जिता श्रेष्ठ हुने यसअघि नै टुंगो लागेको थियो। यसमा अध्यक्ष श्रेष्ठ सहमत थिइनन्। पार्टी संरक्षक चौधरीले एकताको मिति नै बताउन थालेपछि श्रेष्ठले जनमत अध्यक्ष राउतसँग भेटेर छलफल पनि गरेकी थिइन्।
छलफलका क्रममा नाउपाको केन्द्रीय समितिको निष्कर्षअनुरूप नै एकता हुने राउतले बताएका थिए।
अहिले रञ्जिता श्रेष्ठलाई पनि अध्यक्ष बनाएर पार्टी एकता गर्ने समझदारीपछि कार्यदल बनाउन सहमति जुटेको ती नेताको दाबी छ।
निर्वाचन आयोगमा बुझाउने एकीकृत पार्टीको दस्तावेज नै तयार भइसकेको दाबी चौधरीको छ।
‘तर ती दस्तावेजमा हस्ताक्षर नभइसकेकाले परिवर्तन हुने सम्भावना छ,’ संरक्षक चौधरीले भनेका छन्।
-1742801159.jpg)
